Уопсастыба

Дьокуускайга ыам ыйын 10 күнүттэн халааҥҥа үрдүк бэлэмнээх буолуу эрэсиимэ олохтонор

Дьокуускай куорат Уопсастыбаннаһы уонна сонуннары киэҥник тарҕатар ситимнэри кытта сибээскэ департамена иһитиннэрбитинэн,  Дьокуускай куорат баһылыгын Сардана Авксентьева дьаһалынан ыам ыйын 10 күнүттэн сарсыарда 9 чаастан куорат уокуругар “үрдүк бэлэмнээх буолуу” эрэсиимэ  биллэриллэр.

edersaas.ru

Ол курдук “Дьокуускай куорат” куораттааҕы уокуругун сириттэн-уотуттан чугас Өлүөнэ өрүскэ муус барыыта саҕаламмытынан, Ыксаллаах быһыыны-майгыны сэрэтиигэ уонна туоратыыга биир кэлим судаарыстыбаннай тиһик Саха сиринээҕи тиһигин иһинэн Дьокуускай куорат салаатын салалтатын уорганнарыгар уонна күүстэригэр олохтонор.

Үрдүк бэлэмнээх буолуу эрэсиимин кэмигэр Дьокуускай куорат салайар састааба уонна сирдээҕи-уоттааҕы уорганнара, ону тэҥэ куорат олоҕун-дьаһаҕын хааччыйар бары тэрилтэлэр суукканы эргиччи дьуһуурустубалыахтара. Эбийиэктэргэ оттук саппааһа бэлэм, хомунаалынай уонна уот ситимнэрэ арахсыбаттарын туһугар үлэ ыытыллар.

Күнү-дьылы билгэлээччилэр сабаҕалыылларынан, муус барыыта Өлүөнэ өрүскэ Дьокуускай оройуонугар чугастааҕы өрөбүл күннэргэ күүтүллэр.

Бэлэмнээтэ Женни СТРЮКОВА, “Саха сирэ” хаһыат

Хаартыска: интэриниэттэн

0
0

Добавить комментарий