Дьокуускайга 124 киһи ыарыйда.
Бүгүн ковид дьаҥын тэнийиитин туһунан уочараттаах бирифини өрөспүүбүлүкэҕэ суһал ыстаап салайааччытын солбуйааччы Ольга Балабкина ыытта. Ольга Валерьевна Роспотребнадзор оҥорбут иһитиннэриитигэр олоҕуран эппитинэн, ааспыт сууккаҕа ковидка 221 киһи сутулунна. Хомойуох иһин, мантан улахан аҥаара Дьокуускай куоракка ыарыйда. Ол курдук, киин куораппытыгар 124 киһи ыалдьыбыт. Маны таһынан элбэх сутуллуу Мииринэйгэ, Бүлүүгэ, Алдаҥҥа, Намҥа, Өлөөҥҥө бэлиэтэммит. О.Балабкина кылгас болдьоххо дьаҥ тарҕаныытын босхорго үлэ ыытыллыахтааҕын туһунан эттэ.
Кини өрөспүүбүлүкэ үрдүнэн ааспыт сууккаҕа бу ыарыыттан 3 киһи орто дойдуттан туораабытын туһунан иһитиннэрдэ. 6280 чинчийии ыытыллыбыт. Уонна дьаҥы бохсууга сыһыаннаах икки саҥа дьаһал киирбит. Ол курдук, туһааннаах уураахтарга олоҕуран, хантаактаах дьонтон анаалыс ылбат буолбуттар. Анаалыһы ылыыны сөптөөх килиниичэскэй сибикилэр билиннэхтэринэ эрэ ылаллар.
Суһал ыстаап салайааччытын солбуйааччы маны тэҥэ, сүрүн болҕомтону оскуолаларга үөрэх саҕаламмытыгар уурда. Маныаха оҕолор ыалдьыбаттарын туһугар сөптөөх усулуобуйа тэриллиэхтээх, циркулятордар туруоруллуохтаахтар, термометрия ыытыллыахтаах. Уонна МТ учредителлэрэ 65 саастарын ааспыт дьону дьиэлэригэр олордуохтаахтар. Сүрүн кыһамньыны кырдьаҕастарга уонна саастаах дьоҥҥо ууруохтаахпыт диэтэ.
Чэгиэн буолуҥ, мааската кэтиҥ!
Бэлэмнээтэ Женни Стрюкова