Өрөспүүбүлүкэбит тэриллибитэ 100 сылыгар араас үтүө көҕүлээһиннэр, бэлиэ түгэннэр буолаллар. Дьон өрөгөйдөөх үбүлүөйү өрө көтөҕүллэн көрсөр, үтүө дьыалаларынан бэлиэтииргэ кыһаллар. Онуоха 100 сылы кытары ситимнээх бэлиэ түгэннэри түмтүбүт.
Үбүлүөйдээх сылга СӨ бырабыыталыстыбатын көмөтүнэн, Дьокуускайга 100 саҥа оптуобус кэлэн, “ЯПАК” тэрилтэ уонна “Союз Авто” тырааныспардара саҥардылыннылар. «Союз Авто» 35 оптуобуһа «Вектор NEXT» ПАЗ диэн мааркалаахтар.
Оттон саҥа “КАВЗ” оптуобустар кондиционердаахтар, иккилии хос түннүктээхтэр, муосталаахтар, эбии ититэр оһохтоохтор, доруобуйаларыгар хааччахтаах дьоҥҥо анаммыт бары ирдэбиллэргэ эппиэттииллэр. Бу оптуобустар бары гаас уматыгынан үлэлииллэр. Киин куоракка уонна куорат таһынааҕы маршруттарга сүүрүөхтэрэ. Ону тэҥэ, 10 оптуобус Горнай, Нам, Хаҥалас, Мэҥэ Хаҥалас, Хаҥалас улуустарыгар, Нерюнгри, Алдан оройуоннарыгар дьону таһыахтара.
“100 сыл оҕолоро”
Ааспыт сыл ахсынньы 30 күнүгэр Ил Дархан Айсен Николаев Саха Өрөспүүбүлүкэтигэр “100 сыл оҕолоро” диэн тус сыаллаах хапытаалы олохтуур туһунан ыйаахха илии баттаабыта. Хапытаал кээмэйэ – 100 тыһыынча солкуобай, бу 2022 сылга төрөөбүт оҕолорго биэрэллэр.
Бу сыл саҕаланыаҕыттан “100 сыл оҕолоро” хапытаал 2 тыһыынча кэриҥэ оҕоҕо анаммыт. Ону тэҥэ, быйыл 640 дьиэ кэргэн үһүс оҕолоругар Өрөспүүбүлүкэтээҕи ийэ хапытаалын ылар бырааптаннылар.
Санатар буоллахха, дьиэ кэргэн бу хапытаалы бааҥҥа уурдарыы кылаатын арыйарыгар, оҕо үөрэнэригэр, үрдүк технологиялаах мэдиссиинэ көмөтүн ыларыгар, мэдиссиинискэй-социальнай реабилитацияны ааһарыгар, өрөспүүбүлүкэ тас өттүгэр санаторий-куруорт эмтэниитигэр, эмтэри атыылаһарга, Арассыыйа иһигэр дьиэ кэргэнинэн сынньана барарга, олорор дьиэ усулуобуйатын тупсарыыга, тырааныспар атыылаһарга, дьиэ өрөмүөнүгэр, кэтэх хаһаайыстыбаны сайыннарыыга, ол иһигэр тыа хаһаайыстыбатын тиэхиникэтин атыылаһарга, оҕо олоҕун уонна доруобуйатын страховкалыырга туһаныан сөп.
Ангелина Васильева, «Саха сирэ» хаһыат, edersaas.ru
Хаартыска: yakutia.aif.ru