Бүгүн өрөспүүбүлүкэ Ил Дархана Айсен Николаев өрөспүүбүлүкэҕэ коронавирус тарҕаныытын туругун туһунан иһитиннэрдэ.
edersaas.ru
— Өрөспүүбүлүкэҕэ эпидемия балаһыанньата ыарахан соҕус. Ааспыт сууккаҕа 4 саҥа киһи ыалдьыбыта (түбэлтэ) бэлиэтэннэ. Ол курдук, итинтэн 2-тэ – Дьокуускайга, ону тэҥэ Алдаҥҥа — 1, Нерюнгригэ аан бастаан 1 киһи. Бу биллибит дьон киэнэ ыалдьыбыттара эрдэ сабаҕаламмыта ( Дьокуускайга эрдэ ыалдьыбыт киһи дьиэ кэргэнин чилиэнэ, Москваттан кэлбит 1 киһи, Нерюнгригэ эмиэ дьиэттэн тахсыбакка олорбуттара, Алдаҥҥа ыалдьыбыт киһи обсерваторга хара ааныттан үлэлээбит киһи хаптарда).
Саха сиригэр ыарыыны кытта сибээстээх атын уларыйыылар суохтар. Ол эрээри Дьокуускайга 2 ыарыһах туруга ыарахан, кинилэр ИВЛ аппараакка холбонон сыталлар. Сунтаарга баахта бөһүөлэгэр 10 киһи ыалдьыыта тахсыбыт түбэлтэтинэн сибээстээн, өрөспүүбүлүкэ кылаабынай санитарнай бырааһын уонна улуус дьаһалтатын көрдөһүүлэринэн бу баахта бөһүөлэгэ муус устар 30 күнүгэр диэри харантыыҥҥа сабылынна, онон киирии-тахсыы бобуллар, харабылланар. Чайыҥдатааҕы баайдаах сиргэ тохтоотоххо, манна 10 тыһыынча анаалыс ылыллан ыытылынна, сөмөлүөт төннөн иһэр. Онон Москва, Санкт Петербург лабораторияларыттан өрөбүллэр диэки түмүк кэлэрин күүтэбит.
Маны сэргэ бэлиэтээтэххэ, Арассыыйа үрдүнэн балыыһаҕа куойкалары бэлэмнээһиҥҥэ былааны биир бастакынан толорон олоробут. Аны туран, федеральнай үбү туһаныыны тохтоотоххо, бу боппуруос быһаарылынна. Владимир Путин көмөтүнэн эбии 383 мөлүйүөн солкуобайы мэдиссиинэ тэрилтэлэрин хааччыйыыга бэрилиннэ. Федеральнай үп киирдэ. Инники күөҥҥэ үлэлии сылдьар 200-тэн тахса үлэһиккэ бу ый бүтүөр диэри өрөспүүбүлүкэтээҕи уонна федеральнай эбии төлөбүр докумуоннары туһааннаах толоруу процедуратын кэннэ түһүөҕэ, — диэтэ Айсен Николаев.
Женни СТРЮКОВА, “Саха сирэ” хаһыат
Хаартыска: интэриниэттэн