Дьокуускайга 10 ый иһигэр бэйдиэ сылдьар үс тыһыынчаттан тахса ыт, куоска тутулунна
Онон билигин «Жилкомсервис» МУТ быстах кэмҥэ кыылы-сүөлү тутар пуунугар 140 ыт уонна куоска баара бэлиэтэнэр.
Быйыл пуун муостатын уонна сорох вольердары өрөмүөннээбиттэр. Пуун начаалынньыга Валентина Дмитриева, Дьокуускай куорат уопсастыбаннаһы уонна маассабай иһитиннэрэр-биллэрэр сириэстибэлэри кытары үлэҕэ Департаменыгар аһаҕас вольердарга сылаас будкалаахтарын, онно 40 улахан ыт баарын, оттон ыт оҕолоро уонна куоскалар сылаас дьиэҕэ тутуллалларын иһитиннэрбит. Пууҥҥа күн аайы биэстии, биэстэн тахсалыы кыылы аҕалан туттаралларын эппит. Манна даҕатан, кыылы-сүөлү тутар анал биригээдэ баламаттык сыһыаннаспатын, арай, наһаа кырыктаах ыт түбэстэҕинэ, быстах кэмҥэ утутар дозаны туттарга күһэллэллэрин бэлиэтээн эппит.
«Пууҥҥа киллэриллибит ыт, куоска 10 хонук тутуллар. Аһылыгар, көрүүтүгэр-истиитигэр бэтэринээрдэр олохтообут быраабылалара, нуорумалара тутуһуллар. Бу кэмҥэ биһиги кинилэргэ саҥа хаһаайыттары көрдүүбүт», — диэн кэпсээбит. Соторутааҕыттан ыла пуун Дьокуускайдааҕы тыа хаһаайыстыбатын техникумун кытары бииргэ үлэлиир буолбут. Онон преподаватель Светлана Николаева салалтатынан, бэтэринээр буолаары сылдьар ыччаттар кыылы-сүөлү стерилизациялыырга үөрэммиттэр. Маны таһынан, начаалынньык оскуолаларга, тэрилтэлэргэ ыытыллар үтүө санааланыы акциялара кырата суох көмөнү оҥороллорун, волонтердар кыылга-сүөлгэ аналлаах аһы-үөлү аҕалалларын кэпсээбит. Ол гынан баран, хомойуох иһин, бэлэм хотуобай астан сорохтор ыарытыйаллар эбит. Оннук кыһалҕаны кыччатар туһуттан, пуун үлэһиттэрэ түөрт атахтаах доҕоттор астарын арааһын уларытан, арыт хааһы, балык, кэнсиэрбэ биэрэр буолбуттар.
Түмүккэ, көрүүтэ-истиитэ суох кыыл сылдьар ыттары, куоскалары көрбүттэр сайаапкаларын ЕДДС 44-42-29 төлөпүөҥҥэ эрийэн биэриэхтэрин сөп диэн этэллэр.
Онтон түөрт атахтаах доҕордонуон, эрэллээх харабылланыан баҕалаахтары пааспаргытын илдьэ Очиченко уулуссатын 57-гэр турар пууҥҥа кэлэргитигэр ыҥыраллар. Пуун сэрэдэҕэ, чэппиэргэ, бээтинсэҕэ 10.00—16.00 чааска диэри, субуотаҕа уонна өрөбүлгэ 10.00-14.00 чааска диэри үлэлиирин туһунан Дьокуускай куорат уопсастыбаннаһы уонна маассабай иһитиннэрэр-биллэрэр сириэстибэлэри кытары үлэҕэ Департамена иһитиннэрдэ.