Дьокуускайдааҕы тыа хаһаайыстыбатын техникумун устудьуоннара Чысхаанныын көрүстүлэр
Техникум устудьуоннара Саҥа дьыллааҕы каникулларыгар тарҕаһыахтарын иннинэ сыл аҥардааҕы түмүгү таһаардылар. Хас биирдии куурус Тымныы Оҕонньоро уонна Хаарчааната күөн күрэстэһиилэрэ – сонун бырайыагынан буолла. Орто анал үөрэх кыһатын устудьуоннарыгар Тымныы Хаһаайына Чысхаан ыалдьыттаата.
— Быйыл орто анал үөрэх кыһаларын “Инникигэ хардыы” өрөспүүбүлүкэтээҕи научнай кэмпириэнсийэлэрэ биһиги техникуммутугар буолла. Устудьуоннарбыт үксүлэрэ агрооскуолалар выпускниктара буолан, үөрэҕи ылымтыалар. Быраактыкаларын тыа хаһаайыстыбатын тэрилтэлэригэр бараллар. Ол да иһин буолуо, биһиги техникуммут бухгалтердара, агрономнара, бэтэринээрдэрэ былдьаһыкка сылдьаллар. Орто үөрэх кыһатын бүтэрбиттэр аҥардара үөрэхтэрин үрдүккэ салгыыллар, — диэн кэпсиир тыа хаһаайыстыбатын техникумугар сүүрбэччэ сыл үлэлээбит уопуттаах педагог, билигин техникум иитэр үлэҕэ завуһа Анна Филиппова.
Өрөспүүбүлүкэҕэ тыа хаһаайыстыбатын каадырдарын үөрэтэн-такайан таһаарар буолан, орто анал үөрэх кыһата Тыа хаһаайыстыбатын министиэристибэтин кытта ыкса сибээстээхтик үлэлиир. Ааспыт сыл саҥатыттан Алтаннааҕы уонна Төҥүлүтээҕи тыа хаһаайыстыбатын техникумнара Дьокуускайдааҕы техникум филиалларынан буоллулар. Онон бу орто үөрэх кыһата өрөспүүбүлүкэҕэ орто анал үөрэхтээһин биир дьоһун базатынан буолла. Дьокуускайдааҕы тыа хаһаайыстыбатын техникумугар быйылгы үөрэх дьылыгар күнүскү уонна кэтэхтэн салааларга 700-чэкэ ыччат үөрэнэр
Елена ПОТОЦКАЯ.