Дьокуускайдааҕы педагогическай кэллиэс иһинэн алын сүһүөх оскуола арылынна
С.Ф.Гоголев аатынан Дьокуускайдааҕы педагогическай кэллиэс историятыгар аан маҥнайгытын, дириэктэр Ирина Любимова көҕүлээһининэн, алын сүһүөх оскуолата арылынна. Санатан эттэххэ, икки сыллааҕыта баччаларга уһуйаан үлэҕэ киирбитэ.
Быйыл алта кылаас арылынна (4 нууччалыы, 2 сахалыы тыллаах), онно, уопсайа, 150 оҕону ыллылар. Кырачааннары бары үрдүк категориялаах, үгүс уопуттаах учууталлар үөрэтиэхтэрэ.
Кэллиэс өрөспүүбүлүкэҕэ учууталлары бэлэмниир биир сүрүн үөрэх кыһатынан биллэр. Мантан инньэ быһаччы оҕолору үөрэтэ сылдьар уопуттаах учууталлар уонна преподавателлэр күүстэрин түмэн, туох баар сатабылларын, билиилэрин кэлэр көлүөнэни үөрэтэн, иитэн таһаарыахтаах бүгүҥҥү устудьуоннарга иҥэриэхтэрэ. Үөрэтии бырагыраамата көннөрү оскуолаттан туох даҕаны уратыта суох. Арай, оҕотун ахсаана арыый аҕыйах.
Людмила ПОПОВА, “Саха сирэ” хаһыат, edersaas.ru
+1
+1
+1
+1
+1
+1
+1