Дьокуускайдааҕы килиэп кэмбинээтэ Саха сиригэр үлэнэн хааччыйааччыларга 100 бастыҥҥа киирдэ.
Күөн күрэһи нэһилиэнньэ дьарыктаах буолуутун сулууспата ыам ыйын 30 күнүттэн бэс ыйын 28 күнүгэр диэри ыыппыта, САССР тэриллибитэ 100 сылыгар анаммыта. Сайаапкалары 35 филиалга уонна «СӨ нэһилиэнньэ дьарыктаах буолуутун киинин» бэрэстэбиитэлистибэлэригэр ыыппыттара. Хамыыһыйа бары тэрээһиннэри сэргэ, нэһилиэнньэ дьарыктаах буолуутун киинин кытары хардарыта сибээстээх үлэни-хамнаһы көрбүтэ бэлиэтэнэр. Манна уопсастыбаннай үлэҕэ-хамнаска кыттыы, быстах кэмҥэ үлэнэн хааччыйыы, сокуоннай саастарын туола илик гражданнары сайыҥҥы кэмҥэ үлэлэтии, үлэтэ суохтары уопсастыбаннай уонна быстах кэмҥэ үлэ кэнниттэн бастайааннай үлэнэн хааччыйыы көрүллэллэр. Маны сэргэ, үлэ миэстэтин тэрийээччилэр ааспыт сылга нэһилиэнньэ дьарыктаах буолуутун сулууспата тэрийбит дьаарбаҥкаларыгар, сэминээрдэригэр уонна да атын тэрээһиннэригэр кыттыылара учуоттаммыт.
Кыайыылаахтар ортолоругар «Бөртө» сылгы собуота Хаҥалас улууһуттан, Кэбээйиттэн П.А.Кейметинов аатынан «Сэбээн» МУП (дир. Бурцева Людмила Васильевна), «Булуҥ» МУП (дир. Лукин Руслан Семенович), уон икки бааһынай хаһаайыстыбалар, «1Күүлэт» ПСК Бүлүүттэн (бэрэссэдээтэл Тутукарова Елена Петровна), «Горнай-Ас» СХППК (бэрэссэдээтэл Ефремов Николай Николаевич), уо.д.а. ааттаммыттара бэлиэтэнэр.
Бэлиэтээн эттэххэ, күөн күрэс 2018 сылтан ыытыллар диэн иһитиннэрэр СӨ Тыа хаһаайыстыбатын министиэристибэтин пресс-сулууспата.