Дьокуускайдааҕы көтөр фабрикатын саҥардан оҥоруу кэнниттэн саҥа сыах үлэҕэ киирдэ.
Былаан быһыытынан тустаах тэрилтэ сылга 100 мөл кэриҥэ сымыыты атыыга таһаарыахтаах. Санатар буоллахха, Ил Дархан Айсен Николаев тыа хаһаайыстыбатын сайыннарарга аналлаах стратегическай хайысхалаах ыйааҕар этиллибитинэн, 2024 сылга диэри өрөспүүбүлүкэни олохтоох сымыытынан хааччыйыы 65 %-ҥа диэри тиэрдиллиэхтээх. «Ил Дархан Айсен Николаев олохтоох оҥорон таһаарыыны үрдэтэн, өрөспүүбүлүкэни хаачыстыбалаах уонна бэйэ бородууксуйатынан хааччыйарга сорудахтаабыта. Дьокуускайдааҕы көтөр фабриката кэлиҥҥи кэмҥэ тэтимнээхтик сайдар, ол курдук, аны технологияҕа эппиэттиир саҥа эбийиэктэри үлэҕэ киллэрэр. Бу үлэ салгыы ыытыллыаҕа», – диэн СӨ Бырабыыталыстыбатын бэрэссэдээтэлэ Андрей Тарасенко иһитиннэрдэ.
Фабрикаҕа көтөрдөр турар миэстэлэрэ 12200-тэн 55000-ҕа диэри эбиллибит. Көтөрдөргө аналлаах килиэккэлээх саҥа оборудование үлэҕэ киирдэ. «Былырыын саҥардыы үлэтин тэрийбиппит түмүгэр, сыл устата 80 мөл. тахса сымыыты ылары ситиспиппит, бу иннинэ 60 мөл. кэриҥэ этэ. Саҥа сыах аһыллан, быйыл сыл бүтүүтэ 4 мөл. сымыытынан элбэҕи ылыахпыт. Кэлэр сылга өссө биир сыаҕа аһыахпыт, тустаах оборудованиелары атыыластыбыт», — диэн көтөр фабрикатын генеральнай дириэктэрэ Наталья Дягилева эттэ.