Көтөр фабриката балаҕан ыйыгар үлэҕэ киллэрэрдии, 60 000 куурусса турар 14 №-дээх производственнай сыаҕын саҥардыыга үлэлиир.
edersaas.ru
Италияҕа оҥоһулубут саҥа линияны атыылаһан аҕалан таҥыы уонна сыаҕы саҥардыы үлэтэ барыта холбоон, 58 мөл. солк. суумалаах, онтон 31 мөл. солк Тыа хаһаайыстыбатын министиэристибэтэ уйуммут.
Өрөспүүбүлүкэ салалтатын өйөбүлүнэн, кэнники сылларга «Дьокуускайдааҕы көтөр фабриката» АУо саҥа технологиянан сэбилэниигэ күүскэ үлэлиир буолан, сылтан сыл үлэ усулуобуйатын тупсаран иһэр. Сылга 60 мөл. устуука сымыыты ылар таһымҥа тиийдэ. Бу сыл бастакы аҥаарыгар 29 мөл. устуука сымыыты, 124 т көтөр этин оҥордо, нэһилиэнньэҕэ 48 тыһ. көтөрү батарда.
Саҥа сыах таҥыыта бүтэн, алтынньыттан үлэтин саҕалаатаҕына, сымыыттыыр куурусса ахсаана 300 тыһыынчаҕа тиэрдиллиэҕэ, күҥҥэ 265 тыһыынча сымыыт ылыллар буолуоҕа диэн хаһаайыстыба иһитиннэрэр.
Раиса Сибирякова, «Саха сирэ» хаһыат, edersaas.ru