Уопсастыба

Дьокуускай тупсар, киэркэйэр

«Куттала суох уонна хаачыстыбалаах айан суоллара» национальнай бырайыак иитинэн Дьокуускай куорат уокуруктарыгар уонна тастарыгар быйыл, 2021 сылга, 50 км кэриҥэ суол өрөмүөннэниэхтээх. Бу сыалга федеральнай, өрөспүүбүлүкэ уонна муниципалитет бүддьүөттэриттэн 2 млрд солк. тахса үп көрүллүбүт. Ону таһынан, элбэх кыбартыыралаах дьиэлэр тиэргэннэрэ оҥоһуллуохтаахтар.

Ил Дархан Айсен Николаев Дьокуускай куорат баһылыгын Евгений Григорьевы кытта бэҕэһээ куорат иһигэр уонна таһыгар хас да учаастакка сылдьан тиэргэннэри көрбүтэ-истибитэ, үлэ-хамнас хаамыытын бэрэбиэркэлээбитэ. Бэлиэтээн эттэххэ, быйыл 36 уулуссаҕа үлэ ыытыллар — өрөмүөннэнэр суол уһуна 50 км кэриҥэ. Итинтэн 23 эбийиэккэ үлэ бара турар. Маны сэргэ, бүтүн Арассыыйатааҕы норуот фронун хонтуруолунан, бэдэрээччиттэр былырыыҥҥы сыыһалары көннөрөллөр.
Кальвица уулуссатыттан Лермонтов уулуссатыгар диэри суол өрөмүөннэнэр. Манна суолу икки өртүнэн күөх үүнэйилээх тротуар тыргыллар. Оттон куорат таһыгар Набережнай уонна Совхознай, Хатаска Каландаришвили уулуссаларга үлэ тигинэччи салҕанар.
Тиэргэннэргэ Бестужев Марлинскай уулуссатыгар уонна 202 түөлбэ тиэргэннэригэр аһаҕас турар учаастактары болҕомтоҕо ылалларыгар сорудахтаата. Кини үлэ кэлимсэ буоларын ирдээтэ. Таах хаалларбакка үүнээйи олордорго эбэтэр аспаалынан бүрүйэргэ, бетоннуурга эттэ. Итини таһынан Ил Дархан быйыл отут тиэргэн киэркэйиэҕин бэлиэтээтэ. Маныаха мантан ыла сыл аайы отуттуу тиэргэн тупсарыллар буолбута сүргэни көтөҕөр. Айсен Николаев тупсарыллар тиэргэннэр испииһэктэрин билиҥҥиттэн саҕалыыры, бырайыактары бигэргэтэри, олохтоохтору кытары дьүүллэһэри эттэ.
Андрей Сорокин (СИА) хаартыскаҕа түһэриитэ
0
0