Уопсастыба

Дьокуускай төрөөбүт күнүгэр — саҥа тиэргэн

Дьокуускай төрөөбүт күнүгэр, саҥа тиэргэни арыйыы үөрүүлээх быһыыга-майгыга ыытылынна.

Бүгүн, балаҕан ыйын 12 күнүгэр, Дьокуускай куорат тэриллибитэ 389 сылыгар, Лермонто уулуссатын 25/2 №-гэр тиэргэн арыллыытын үөрүүлээх түгэнэ буолла. Манна СӨ Ил Дархана Айсен Николае кытынна.
«Куораппыт саамай улахан баайа — оҕолор. Мин куорат дьаһалтата, «Индрайвер» үтүө санаа пуондата СӨ Бырабыыталыстыбатын өйөбүлүнэн үүнэр көлүөнэбитигэр бэлэх оҥорбут былаһааккаларыгар элбэх оҕо оонньуу сылдьарыттан, кинилэр олус астыммыттарыттан наһаа үөрдүм». – диэтэ Айсен Николаев Дьокуускай төрөөбүт күнүнэн уонна оҕо оонньуур былаһаакката арыллыбытынан эҕэрдэлииригэр.
Ил Дархан тиэргэннэри тупсаран оҥоруу улахан суолталааҕын бэлиэтээтэ: «Киһи дьиэтин подъеһыттан тиэргэнигэр тахсар. Оттон дьиэтин таһынааҕы сиртэн-уоттан, төһө кырасыабай, кэрэ оҥоһуулааҕыттан санаата-оноото тутулуктанар».
Ил Дархан өйөбүлүнэн өрөспүүбүлүкэ киинигэр 2021 сылга  дьиэ-уот таһынааҕы 15 тиэргэн тупсарыллыбыт. Эһиил маннык оҥоһуулаах тиэргэн 45-кэ тиийиэхтээҕин туһунан Ил Дархан эттэ уонна тупсаран оҥорууга көмөлөспүт тэрилтэлэргэ махтанна. Бу этиллибит 15 тиэргэнтэн аҕыһа «Индрайвер» пуондатын кытта бииргэ үлэлээһининэн тупсарыллыбыт.
— Куораппытын тупсаран кэрэ, ордук оҥорон иһиэхпит диэн эрэнэбин, — диэтэ Ил Дархан уонна бу күннэргэ Дьокуускай куораты 2032 сылга диэри сайыннарыы туһунан ыйаахха илии баттаабытын иһитиннэрдэ. — Бу ыйааҕынан 300 маннык тиэргэн тутуллуо, өссө түөлбэ иһинээҕи 150 сир-уот оҥоһуллуо. Бу барыта табылыннаҕына, Дьокуускай аан дойду бастыҥ куоратынан буолуоҕа.
Дьокуускай куорат баһылыга Евгений Григорьев уонна куорат 136-с түөлбэтин салайар Елена Колесова Айсен Николаевка өйөбүлүн иһин махтаннылар. «Дьокуускай куорат сиригэр-уотугар маннык хабааннаах өрөмүөн уонна тупсарыы үлэтэ ыытылла илик. Уон сылга 300 тиэргэни тупсарыы — бу куорат бүттүүнэ. Дьиэлэр-уоттар тупсаҕай тиэргэннэрэ олохтоохтор тардыһар кииннэринэн буолуоҕа», — диэтэ Евгений Григорьев.
Улахан бэлэхтэн оҕолор ордук үөрдүлэр. «Хатааһылыыр сир, хачыал уонна карусель баара наһаа үчүгэй. Дьүөгэлэрбин кытта күн аайы манна оонньуом», — диэтэ сэттэлээх Айсаана Бысиева. «Барытын сөбүлээтим. Манна мин ыалдьыттыы кэлэ сылдьабын. Биһиги дьиэбит таһыгар, Курнатовскай уулуссатыгар, эмиэ маннык былаһаакка баар буолуоҕун баҕарабын», — диир аҕыс саастаах Маша. «Сырылыырбын ордук сөбүлээтим. Өссө тардынар сир баара үчүгэй, дьарыктаныам», — диэн Дима Андреев санаатын үллэһиннэ.
Санатар буоллахха, эбийиэк «Формирование современной городской среды на территории городского округа «город Якутск» на 2020-2024 годы» муниципальнай бырагыраама иитинэн олоххо киллэриллибит.
Мария Васильева (СИА) хаартыскаларга түһэриитэ
0
0