Биһиги сайтпыт 2018 сыл сайыныгар иһитиннэрбитин курдук, РФ Силиэстийэлиир кэмитиэтин Илин Сибиирдээҕи тырааныспарга силиэстийэлиир управлениета Дьокуускай куорат аэропордун генеральнай дириэктэрэ Николай Местниковка холуобунай дьыала тэрийбитэ. Бастаан РФ Холуобунай кодексатын 290-с ыст. 6-с чааһынан, ол эбэтэр, дуоһунастаах киһи сокуоннайа суох дьайыылары оҥоруу иһин, ураты бөдөҥ кээмэйдээх бэриги ылыы бэлиэтэ баарынан.
Силиэстийэ кинини хас да сыллааҕыта олохтоох урбаанньыттартан уопсайа 27 мөл. солк. сууммалаах бэриги түүрэйдээн ылыыга буруйдаабыта. Ол дьон киин куорат аэропордугар бэйэлэрин дьыалаларынан туох да мэһэйэ-харгыһа суох дьарыктаналларыгар диэн. Онтон 204-с ыстатыйа («Коммерческай подкуп») эбиллибитэ.
Силиэстийэ кэмигэр Местников бастаан Иркутскай куоракка силиэстийэлиир изоляторга хаайыллыбыта, онтон хаарчахтыыр миэрэтэ дьиэтээҕи хаайыыга уларыйбыта.
Тугунан да бигэргэнэ илик хобдох сурах тарҕанаатын, 2018 сыл от ыйын 6 күнүгэр тутуллубут Николай Местников интэриниэт-саайтарга иһитиннэрии таһаарбыта:
«Дорогие друзья, коллеги, единомышленники! В эти дни ваша поддержка, ваши слова очень много значат для меня и для моей семьи. Я всем вам очень признателен. Судебный процесс будет долгим, наберитесь терпения. В сложившихся обстоятельствах продолжать предвыборную кампанию невозможно. Но, я надеюсь, что все то позитивное и доброе, что мы с вами начали, будет продолжено».
Санатар буоллахха, Николай Местников Дьокуускай куорат Гагаринскай уокуругуттан Ил Түмэҥҥэ дьокутаатынан туруммута. Итинэн сибээстээн, бу дьыаланы кинини туоратар сыаллаах «политическай сакаас» быһыытынан эмиэ ылыммыттара.
Дьокуускай куорат федеральнай суутун пресс-сулууспата иһитиннэрбитинэн, Николай Местников дьыалатын көрүү бэҕэһээҥҥиттэн, муус устар 11 күнүттэн, саҕаланна.
Ити иннинэ, бу дьыл кулун тутар 12 күнүгэр буолбут дьыаланы барыллаан истии мунньаҕар, Местников дьыалатын ураты бэрээдэгинэн көрүүттэн аккаастаммыт (бастаан бэйэтэ оннук хадатаайыстыба киллэрэн баран). Онон, дьыалата аһаҕас суут мунньаҕар көрүллэр.
Николай Местников буруйдааһыны хайатын да билиммэт.
Биһиги корр., «Саха сирэ» хаһыат, edersaas.ru
Хаартыска: интэриниэттэн.