Дьокуускай “SMART” библиотекатыгар суруйааччы Николай Неустроев аата иҥэрилиннэ
Дьокуускай куорат Дууматын 37-с уочараттаах мунньаҕынан бигэргэтиллэн, Дьокуускайдааҕы “SMART” библиотекаҕа классик суруйааччы, драматург Николай Неустроев аата иҥэрилиннэ.
Санатан эттэххэ, бу библиотека киин куорат 203-с оройуонугар 2019 сыллаахха аһыллыбыта. Уһук Илин эрэгийиэннэригэр ханна да суох бырайыак. Библиотека сүрүн сыалынан аныгы үйэ сиэринэн инновационнай технологиялары туһанан оҕоҕо үөрэҕи, билиини тиэрдии буолар. Ол курдук, библиотекаҕа аныгы технологиянан туһанан араас бырайыагы, үлэни оҥоруохха сөп. Ону сэргэ төрүт култуураны үөрэтиигэ, оҕо айар дьоҕурун сайыннарыыга хас да анал бырагыраамалаах.
Дьокуускай куорат дьокутааттара 37-с уочараттаах мунньахтарыгар библиотекаҕа суруйааччы Николай Неустроев аатын биэрэргэ куоластаатылар.
Николай Денисович саха литературатын төрүттэспит дьонтон биирдэстэрэ, драматург. Кини 1895 сыллаахха Байаҕантай улууһугар төрөөбүтэ. Платон Алексеевич Ойуунускайы, Максим Кирович Аммосовы кытары бииргэ үөрэммитэ. Өрөспүүбүлүкэ литературнай, уопсастыбаннай олоҕор сүҥкэн кылааты киллэрсибитэ. Бастакы айымньыта “Дикая жизнь” диэн ааттанан 1915 сыллаахха бэчээттэммитэ. Кини саха литературатыгар комедия жанрын киллэрбит суруйааччы буолар.
Аграфена КУЗЬМИНА