Бүгүн Дьокуускай куораттааҕы Дуума уочараттаах сессиятыгар Айсен Николаев кытынна. Кини, бастатан туран, Дьокуускай куораты 6 ордук сыл салайбыт кэмин ахтан-санаан ылла.
Мээринэн үлэлиир кэмигэр социальнай инфраструктураны сайыннарыыга – оскуолалары уонна дьыссааттары, култуура дьиэлэрин тутууну ыыппытын бэлиэтээтэ. Уулуссаны өрөмүөннээһин тэтимин түргэтэтии түмүгэр уулусса-суол тиһигин саҥардан оҥоруу былаана ол кэмҥэ торумнаабыттар. 2011 сылга 170 тыһ. кв. м. 2016 сылга 374 тыһ. кв. м. тиэрдибиттэр. 2012 сылтан куораттан балтараа тыһыынча саахалланар уонна хаарбах дьиэлэртэн дьону көһөрбүттэр.
Айсен Николаев мээринэн үлэлээбит сылларыгар куорат хааһынатыгар нолуок киириитэ 1-тэн 2 миллиард солкуобайга диэри улааппыт (2017 с. – 1955,4 мөл солк.). Бүддьүөт тус дохуота икки төгүл кэриҥэ үрдээбит. Ол түмүгэр куорат хапытаалынай эбийиэктэргэ инвестицияны угар кыахтаммыт.
“Дьокуускай сайдыыта миэхэ өрөспүүбүлүкэ Ил Дарханын быһыытынан дьоһун суолталаах. 2018 сылтан биһиги Инвестиционнай бырагырааманан киин куорат эбийиэктэрин үбүлээһини улаатыннарбыппыт. Өскөтүн 2018 сыллаахха Дьокуускай эбийиэктэригэр 3 млрд 918 мөл солкуобай буоллаҕына, 2019 сыллаахха – 4 млрд 107 мөл., 2020 сылга – рекордка киирбит 8 млрд 700 мөл солкуобай!”, — диэтэ дьокутааттар иннилэригэр тыл этиитигэр Айсен Николаев.
2018 сылтан Дьокуускай уулусса-суол тиһигин саҥардыыга 4 млрд 45 мөл солкуобай ыытыллыбыт. Маннык үгүөрү үбү өрөспүбүлүкэттэн Дьокуускай урукку өттүгэр ыла илигэ. “Онон Дьокуускай Саха Өрөспүүбүлүкэтин дьоһун киининэн буоларын туһугар күүстээх соруктары туруорабыт. Ону тэҥэ Арассыыйа бөдөҥ эрэгийиэннээҕи киинэ буола үүнүөхтээх. Бэйэтин төрүттэммитэ 400 сылын киин куораппыт олорорго үрдүк хаачыстыбалаах куорат быһыытынан көрсүөхтээх”, — диэтэ салгыы кини.
Ил Дархан 2021 сыллаахха Анал этиитигэр Дьокуускай куораты 2032 сылга диэри сайыннарыы бырайыагын оҥорорго соругу туруорбута. Бырайыакка бырабыыталыстыба, Ил Дархан уонна Бырабыыталыстыба Дьаһалтатын, куорат дьаһалтатын бэрэстэбиитэллэрэ кытыннылар. Дьокуускай куораттааҕы Дуума уонна куораттан Ил Түмэн дьокутааттара эмиэ кыттыстылар.
Онон саҥа ыйаах Дьокуускай бигэ туруктаах сайдыытын түстүөҕэ.
Бэлэмнээтэ Женни Стрюкова