Сүрүн Уопсастыба

Дьокуускай саамай үрдүк туочукатыгар Арассыыйа былааҕа тэлимнээтэ

Саха сирин салалтата уонна биллэр спортсменнара Арассыыйа Судаарыстыбаннай былааҕын күнүгэр ЯГРЭС -2 көрөр былаһааккатыгар үөрүүлээх быһыыга-майгыга дойду сүрүн бэлиэтин – Арассыыйа триколорун көтөхтүлэр.


Маннык тэрээһиннэр бары биир кэмҥэ өрөспүүбүлүкэ бары муниципалитеттарыгар ыытылыннылар.
Санаттахха, от ыйын 26 күнүгэр Норуоттар икки ардыларынааҕы олимпийскай кэмитиэт Арассыыйа Олимпийскай кэмитиэтигэр Арассыыйа спортсменнарын 2020 сылга Токиоҕа ыытыллар Сайыҥҥы Олимпийскай оонньууларга ыҥырда. Онон спортсменнар бэйэлэрин дойдуларын былааҕынан киириэхтэрэ.
Бэлиэ түгэнинэн #МойФлаг патриотическай аахсыйаны ыыппыттара, итиннэ Саха сирин биллэр спортсменнара, уопсастыбаннас кыттыбыттара. Атырдьах ыйын 22 күнэ ураты күн буолла. Саха сирин бары оройуоннарыгар түмсүүлээхтэрин көрдөрөн, аан дойдуга эйэ туһугар Арассыыйа былааҕын бары биир кэмҥэ тэҥинэн таһаарбыттара, ол иһигэр ЯГРЭС-2 көрдөрөр былаһааккатыгар.
Биһиги былаахпыт 300 тахса саастаах. Биһиги үрдүбүтүнэн тэлибирээтэҕинэ улуу, модун Арассыыйанан киэн туттуох санаа киирэр, — диэн СӨ Ил Дарханын уонна Бырабыыталыстыбатын Дьаһалтатын салайааччы Афанасий Владимиров бэлиэтээтэ. – Бүтүн Саха сирин киин өттүн уотунан хааччыйар эбийиэккэ саҥа үгэһи саҕалаатыбыт. Бу күн биир дойдулаахпыт Василий Егоров Екатеринбурга Аан дойду боксаҕа чөмпүйэнээтигэр кыттарга Арассыыйа сүүмэрдэммит хамаандатыгар киириитин кытта сөп түбэспитэ үөрүүлээх. Өрөспүүбүлүкэ спортсменнара уонна ыччаттара Василий туһугар “ыалдьыахтара” уонна Саха сирин уонна Арассыыйа туһугар үлэлиэхтэрэ диэн эрэнэбин”.
Арассыыйа гимнинэн, уопсастыбаннас уонна эдэр спортсменнар ытыс таһыныыларын ортотугар АГИП салайааччыта Афанасий Владимиров, боксаҕа Арассыыйа, Европа уонна аан дойду икки төгүллээх чөмпүйүөнэ Василий Егоров, Сурдлимпийскай оонньуулар чөмпүйүөннэрэ Василий Стрекаловскай, көҥүл тустууга Аан дойду кубогын хаһаайына Виктор Рассадин, кикбоксиҥҥа аан дойду кубогын түөрт төгүллээх хаһаайына Вадим Колтовской уонна Аан дойдутааҕы Гимназиада боруонса призера Аина Моисеева ЯГРЭС-2 Арассыыйа триколорун көтөхтүлэр.
“Бары сомоҕолостохпутуна, биһиги кыайтарбаппытын өйдүөхтээхпит! Арассыыйа Судаарыстыбаннай былааҕын күнүнэн!” – диэтэ Василий Егоров.

Иван Евсеев.

0
0
Telegram @edersaas20

Добавить комментарий