Уопсастыба

Дьокуускай саҥа түөлбэтэ хайдах буолуоҕай?

Дьокуускай куорат соҕуруу өттүгэр Покровскайдыыр суол 7 км баар «Воинскай чаас» түөлбэтэ хайдах буолуохтааҕын көрдөрдүлэр. Бу туһунан СӨ эрэгийиэни салайар киин (ЦУР) иһитиннэрдэ.
Түөлбэҕэ дьон олорор 66 дьиэтин таһынан, икки тыһыынча кэриҥэ үөрэнээччигэ икки оскуола, икки уһуйаан, поликлиника, успуордунан дьарыктанар саалалаах сабыылаах каток, баһаарнай чаас, офистар уонна маҕаһыыннар баар буолуохтара. Манна өссө пааркалар уонна искибиэрдэр былааннаналлар.
«Кымырдаҕас уйатын» курдук буолуо суоҕа дииллэр. Дьиэлэр саамай үрдүктэрэ — тоҕус мэндиэмэн. Ол гынан баран аҥаара иккилии, үстүү мэндиэмэннээх буолуохтара (таунхаус) диэн суруйаллар. Түөлбэ суоллуун-иистиин, тиэргэнниин сырдык уоттанар-күөстэнэр.
2022 сылга аан бастаан сэттэ дьиэ үлэҕэ киириэ. 2023 сылга өссө 12 дьиэ уонна уһуйаан, 2024 сылга – оскуола уонна успуорт саалалаах сабыылаах каток былааннаналлар. Салгыы 36 иккилии, үстүү мэндиэмэннээх дьиэлэр, иккис уһуйаан уонна оскуола, поликлиника уонна баһаарынай депо үлэҕэ киириэхтээхтэрэ ыйыллар.
«Бырайыак сыала — олорор дьиэҕэ наадыйыы боппуруоһун быһаарыы, тутуу сыанатын намтатыы уонна атыылаһааччыларга квадратнай миэтэрэ сыанатын кыччатыы», — диэн СӨ Тутуу министиэристибэтигэр этэллэр.
1
0