Ыам ыйын 9 күнүгэр Кыайыы 75 сылынан байыаннай сөмөлүөттэр киин куорат үрдүнэн сэлэлээн көтүөхтэрэ.
edersaas.ru
Сыл ахсын байыаннай сөмөлүөттэр Москва үрдүнэн парааттыылларын билэбит. Быйыл үгэс быстыбакка, Москваҕа Кыһыл болуоссат үрдүнэн 75 сөмөлүөт сэлэлээн көтүөҕэ. Ити курдук байыаннайдар бэтэрээннэри чиэстииллэр.
Ону тэҥэ, байыаннай авиация сөмөлүөттэрэ, бөртөлүөттэрэ Арассыыйа 47 куоратын үрдүнэн парааттыахтара. Ол куораттар истэригэр Дьокуускай эмиэ киирдэ. Маннык ураты параады Уһук Илин эрэгийиэнигэр 13 куорат: Владивосток, Чита, Уссурийскай, Комсомольск-на-Амуре, Биробиджан, Улан-Удэ, Южно-Сахалинскай, Благовещенскай, Белогорскай, Петропавловскай-Камчатскай, Магадан, Курильскай, Дьокуускай куорат олохтоохторо көрөр кыахтаахтар.
— Бөртөлүөттэр 200 км/ч, сөмөлүөттэр 400 км/ч, истребителлэр, бомбардировщиктар 600 км/ч түргэннээх көтүөхтэрэ. Билиҥҥитэ экипажтар кылгас болдьоххо ыга сыстан, тэҥҥэ көтүүлэрин эрэпэтииссийэлииллэр. куорат үрдүнэн намтаан, эргийэн, уонча мүнүүтэ көтөллөрө сабаҕаланар”, — диэн Илиҥҥи байыаннай уокурук пресс-сулууспатын салайааччы Александр Гордеев иһитиннэрдэ.
Дьокуускай үрдүнэн хас чааска көтүөхтэрэ чопчуланыаҕа. Үйэҕэ биирдэ кэлэр ураты көстүүнү көтүтүмэҥ!
Ангелина Васильева, “Саха сирэ” хаһыат, edersaas.ru
Хаартыска: fedpress.ru