Остуол тенниһин сэҥээрэр, сэргиир дьоҥҥо үөрүүлээх сонун баар буолла. Ол курдук, Дьокуускайга култуура уонна сынньалаҥ пааркатыгар, от ыйын 1 күнүгэр, сайыҥҥы теннистиир саала арылынна. Бу туһунан Дьокуускай куорат дьаһалтатын пресс-сулууспата иһитиннэрдэ.
«Настольный теннис — вид активного отдыха и реабилитации инвалидов» инклюзивнай бырагыраама «Норуот бүддьүөтэ» муниципальнай бырагыраама көмөтүнэн олоххо киирдэ.
Бырайыагы салайар, «Доступная среда — социум»НКО бэрэссэдээтэлэ, РФ остуол тенниһигэр спорт маастара , I группалаах инбэлиит Михаил Неустроев бырайыак өрөспүүбүлүкэ столицатын олохтоохторугар уонна ыалдьыттарыгар суолталаах буоларын бэлиэтээтэ.
«Нэһилиэнньэни, ол иһигэр инбэлииттэри маассабай спортка тардар, угуйар сыал-сорук тутар. «Норуот бүддьүөтэ» куорат бырайыага баар буолан, былырыын остуол тенниһин биэс остуолун уонна 230 тыһ. тахса суумаҕа онно наадалаах мала-сала атыылаһыллыбыта. Эһиил өссө шахматтыыр сири оҥорор былааннаахпыт«, — диэн этэр Михаил Неустроев.
Спорт сайыҥҥы саалатын тутууну спортсменнар, остуол теннииһин сөбүлүүр дьон уонна Дьокуускай куорат дьаһалтата, уо.д.а. спонсордаабыттар.
Дьокуускай куорат баһылыга Евгений Григорьев бу сааланы тутан олоххо киллэрэргэ көмөлөспүт, өйөбүлү оҥорбут дьоҥҥо махтанна.
«Бырайыак наһаа таблынна, сатанна дии саныыбын. Бу боппуруос куорат олохтоохторо, уопсастыбанньыктар бэйэлэрин көҕүлээһиннэринэн быһаарылынна. Нэһилиэнньэ астына, дуоһуйа сынньанарыгар эрэнэбин«, — диэн бэлиэтээтэ кини.
“Доступная среда — Социум” кэммиэрчэскэйэ суох тэрилтэ бэрэссэдээтэлэ, РФ остуол тенниһигэр спорт маастара Михаил Неустроев «СӨ адаптивнай физкултуураны уонна спорду сайыннарыыга кылаатын иһин» СӨ Физкултуураҕа уонна спорка министиэристибэтин бочуоттаах бэлиэтинэн наҕараадаланна. Бэлиэни спорт миниистирэ Леонид Спиридонов туттарда.
«Бүгүҥҥүттэн бигэ тирэхтээх үүнэр көлүөнэҕэ, кыайыыга дьулуурга, бастыҥнар кэккэлэригэр сылдьарга саҕалааһын олуга уурулунна«, — диэтэ Леонид Спиридонов.
Остуол тенниһин онньуурга анаммыт сайыҥҥы сааланы арыйыы үөрүүлээх түгэнигэр, кыһыл лиэнтэни Дьокуускай куорат баһылыга Евгений Григорьев СӨ физкултуура уонна спорт миниистирэ Леонид Спиридонов, «Доступная среда – Социум» НКО бэрэссэдээтэлэ Михаил Неустроев, остуол тенниһин Федерациятын бочуоттаах Бэрэсидьиэнэ Альбина Поисеева, Дьокуускайга култуура уонна сынньалаҥ пааркатын дириэктэрэ Виктор Обутов кыттыыны ыллылар.