Дьокуускай – Орегон табаарыстыы көрсүһүү: дьиэлээхтэр ыалдьыттарыгар дьиппиэрэн биэрдилэр
Бэҕэһээ, атырдьах ыйын 1 күнүгэр, Дьокуускай куорат дьаһалтата, тустууга федерацията “Триумф” спорт киинигэр “Sakha-USA Wrestling Exchang” бырайыак иитинэн АХШ Орегон штатын уонна Дьокуускай куорат көҥүл тустууга уолаттарга сүүмэрдэммит хамаандаларын табаарыстыы көрсүһүүлэрин үрдүк тэрээһиннээхтик ыытан, тустууну сэҥээрээччилэргэ спорт умнуллубат бырааһынньыгын бэлэхтээтилэр.
Орегон штат хамаандатыттан Дерик Керр (46 кг), Райан Зеллер (52 кг), Рикки Хаф (55 кг), Гевен Холли (60 кг), Ноа Уотчсмуз (64 кг), Сойер Майерс (70 кг), Логан Миик (70 кг), Лэйтен Бригс (78 кг), Брюс Колтер (85 кг), Эйвери Джарамилло (90 кг), Бо Кроуфорд (100 кг), Адам Лэмб (122 кг) туһуннулар.
Бары кэриэтэ классическай уонна көҥүл тустууга штаттарын чөмпүйүөннэрэ, призердара. Кинилэр ортолоругар дойду чөмпүйэнээтин кыайыылаахтара бааллар.
Дьокуускай хамаандатын салайааччылара, Саха Өрөспүүбүлүкэтин үтүөлээх тириэньэрдэрэ Иннокентий Конкин уонна Никита Никифоров табаарыстыы көрсүһүүгэ Бүттүүн Арассыыйатааҕы, өрөспүүбүлүкэтээҕи, Уһук Илиҥҥи күрэхтэһиилэрин кыайыылахтарын: Михаил Бродниковы, Эльшад Агаевы, Айаал Белолюбскайы, Михаил Сергеевы, Эдгар Худогизовы, Ренат Чердоновы, Артем Аммосовы, Алексей Ефимовы, Дьулустаан Борисовы, Максим Толмачевы, Никита Валеевы уонна Никита Хабаровы туруордулар.
Эдэр бөҕөстөр уон икки ыйааһыҥҥа күөн көрүстүлэр. Хас биирдии хапсыһыы сытыы бырахсыылардаах, тыҥааһыннаахтык барда. Ыалдьыттарбыт көҥүл тустууну сэргэ “классиканан” дьарыктаналлара харахха быраҕыллар — былчыҥ, быһыы-таһаа мааны уолаттара. Кинилэргэ тэҥнээтэххэ, биһиэннэрэ оҕотук курдук көһүннэллэр, албастара элбэҕинэн, техникаларынан биир мутук үрдүк тураллара хапсыһыыттан хапсыһыыга дьэҥкэтик көһүннэ. Америка бөҕөстөрө, Орегон хамаандатын тириэньэрэ Кайл Темпл, бөлөх салайааччыта Майк Саймонс Саха сирин тустууктарыттан элбэҕи иҥэриммит буолуохтаахтар.
Табаарыстыы көрсүһүү 8:4 ахсаанынан Дьокуускай хамаандатын кыайыытынан түмүктэннэ. Дьиэлээхтэр көбүөр хаһаайына буолалларын илэ-чахчы көрдөрдүлэр.
Күрэхтэһии бастыҥнара анал бириистэринэн бэлиэтэннилэр. Дерик Керр (Орегон) уонна Алексей Ефимов (Дьокууксай) “Бастыҥ тустуук” номинациянан, Эльшад Агаев (Дьокууксай) — “Чаҕылхай хапсыһыы”, Логан Миик “Кыраһыабай быраҕыы” бириистэринэн бэлиэтэннилэр.
АХШ Орегон штатын уонна Дьокуускай куорат көҥүл тустууга уолаттарга сүүмэрдэммит хамаандаларын табаарыстыы көрсүһүүлэрэ
Дьокууксай куорат. 2017 сыл атырдьах ыйын 1 күнэ. “Триумф” спорт киинэ.
46 кг. Михаил Бродников (Дьокуускай) — Дерри Керр (Орегон) — 14:18, туше
52 кг. Эльшад Агаев (Дьокуускай) – Райан Зеллер (Орегон) — 10:0
55 кг. Айаал Белолюбскай (Дьокуускай)) – Рикки Хаф (Орегон) — 12:1
60 кг. Михаил Сергеев (Дьокуускай) — Гэвен Холли (Орегон) 0:10
64 кг. Эдгар Худогизов (Дьокуускай) – Ноа Уотчсмуз (Орегон) 2:12
70 кг. Ренат Чердонов (Дьокуускай) – Сойер Майерс (Орегон) 18:7
74 кг. Артем Аммосов (Дьокуускай) – Логан Миик (Орегон) 2:12
78 кг. Алексей Ефимов (Дьокуускай) – Лэйтен Бригс (Орегон) 8:0, туше
85 кг. Дьулустаан Борисов (Дьокуускай)) — Брюс Колтер (Орегон) 19:15
90 кг. Максим Толмачёв (Дьокуускай) — Эйвери Джарамилло (Орегон) 10:0
100 кг. Никита Валеев (Дьокуускай) — Бo Кроуфорд (Орегон) 10:0
122 кг. Никита Хабаров (Дьокуускай) – Адам Лэмб (Орегон) 8:4.
Роман ПОПОВ, “Саха сирэ” хаһыат, edersaas.ru
Ааптар хаартыскаҕа түһэриитэ