“Эйэ-Маай-ГТО!” диэн диэбиһинэн Дьокуускай куоракка ыам ыйын 3-5 күннэригэр ГТО нуорматын туттарыы күннэрэ ыытыллыаҕа. Ким баҕалаах Н.Н.Тарскай аатынан “Туймаада” стадиоҥҥа кэлэн ГТО нуорматын туттарыан сөп.
Петр ПАВЛОВ, “Саха сирэ”, edersaas.ru
Саха Өрөспүүбүлүкэтин физическэй култуураҕа уонна маассабай спорка управлениета иһитиннэрбитинэн, ыам ыйын 3 күнүгэр – перекладинаҕа тардыныыга, 16 киилэлээх гиирэни өрө анньыыга, гимнастическай ыскамыайкаҕа туран эрэ иннин диэки төҥкөйөн имигэһи көрдөрүүгэ, миэстэттэн икки атаххынан тэбинэн ырааҕы ыстаныыга, көхсүгүнэн сытан эрэ ыйааһыҥҥын көтөҕүүгэ, пневматическай бинтиэпкэнэн ытыыга нуормалар туттарыллаллар.
Онтон ыам ыйын 4 күнүгэр – пневматическай бинтиэпкэнэн ытыы (иннинээҕи күн ким бириэмэ булан ыппатахтарга), 100 миэтэрэҕэ, 2 уонна 3 килэмиэтиргэ сүүрүүлэр.
Ыам ыйын 5 күнүгэр – пневматическай бинтиэпкэнэн ытыы, спортивнай снаряды быраҕыы (ДьТХГА ипподромугар) уонна 2, 3, 5 км дистанцияҕа кросс (Култуура уонна сынньалаҥ паарката).
Ким кыттыан баҕалаах, бэйэҕит сааскытыгар ирдэнэр нуормалары ГТО Бүтүн Россиятааҕы физкультурнай-спортивнай комплексын официальнай сайтыттан (http://gto.ru/) билсиэххитин сөп.
ГТО нуормаларын туттарыыга баҕалаахтартан — кыттааччы сайаапката, пааспар, ГТО нуорматын туттарыыга анал нүөмэр (ол инниттэн http://gto.ru/ сайтка киирэн хайаан даҕаны регистрацияланыахтааххын), быраас көҥүлэ наадалар. Ким туох ыйытыылаах 8 (4112) 42-07-86 нүөмэргэ эрийэн сиһилии билсиэххитин сөп.
Ыспыраапка:
ГТО интэрниэккэ www.gto.ru диэн анал сайтаах. Ол сайтка регистрацияламмыт, бэйэҥ анал нүөмэргин ылбыт буоллаххына эрэ, ГТО нуормаларын туттарар кыахтанаҕын.
Аны, үөрэнээччи БКЭ туттарар, предметтэринэн баалларын таһаараллар, онно ГТО көмүс бэлиэлээх буоллаҕына, үрдүк үөрэх кыһатыгар быһаччы ылыллар кыахтаах. Холобур, 80 бааллаах буоллаххына, эйиэхэ 10 баалы эбиэхтэрин сөп. Оччоҕуна биир харыс үрдээн тахсар. Өскөтүн баал тэҥнэһэн хааллаҕына, ГТО бэлиэлээх буоллаххына, эйигин үөрэххэ ылыахтаахтар. Итиннэ Россия Үөрэххэ министиэристибэтин анал бирикээһэ баар.
Петр ПАВЛОВ, “Саха сирэ”, edersaas.ru