Ковидынан ыалдьыбыт оҕолор доруобуйаларын ханна салгыы чөлүгэр түһэрэллэрий?
edersaas.ru
Бүгүн “Талбан” биэриигэ коронавирустан үтүөрбүт оҕолору чөлүгэр түһэрэр “Сосновый бор” туһунан көрдөрдүлэр. Бу оҕолор доруобуйаларын тупсарар киин сэбиэдиссэйэ Изабелла Семеновна Тихонова кэпсээтэ. Билигин доруобуйаларын чөлүгэр түһэрэ Дьокуускай куорат уонна куорат таһынааҕы дэриэбинэлэртэн 80 оҕо эмтэнэ сытар. Бары чэпчэкитик ыалдьыбыт оҕолор киирбиттэр.
“Сосновай борга” оҕолор 14 күн чөлүгэр түһэллэр, сынньаналлар, эмтэнэллэр эбит. Кислородтаах коктейль иһэллэр, күөмэйдэрин, муннуларын эмтэнэллэр, харахтарын анал тренажерга эрчийэллэр. Манна араас аппараат эрэ толору. Күҥҥэ иккитэ температураларын мээрэйдииллэр. 7-12 саастаах оҕолору сынньалаҥ кэмнэригэр баһаатайдар дьарыктыыллар.
Быһата, “Сосновый бор” оҕо доруобуйатын чэбдигирдэр, сынньатар киин хамсык кэмигэр ыалдьыбыт оҕолору чөлүгэр түһэриигэ олус туһалаах буолсу.
Бэлэмнээтэ Женни Стрюкова, edersaas.ru
Хаартыска: интэриниэттэн