Дьокуускай куорат сайдыытыгар бүтүн Арассыыйатааҕы куонкурус биллэрилиннэ

Бөлөххө киир:

Быйылгы Илиҥҥи экономическай форумҥа РФ бэрэсидьиэнэ Владимир Путин Уһук Илин эрэгийиэннэрин куораттарын сайыннарыы, тупсаран оҥоруу бырагырааматын бигэргэппитэ. Ол чэрчитинэн, Дьокуускай куорат маастар-былаанын оҥорууга бүтүн Арассыыйатааҕы аһаҕас куонкурус биллэрилиннэ. Бу туһунан бүгүн Ил Дархан Айсен Николаев “ТАСС” ыыппыт пресс-конференциятыгар иһитиннэрдэ.

Бу куонкурус “ДОМ.РФ” хампаанньа кыттыылаах ыытыллар. Бу хампаанньа куораттар социальнай тутууларыгар, дьиэлэр тастарын тупсарыыга, инженернэй тутууларын ыытыыга үлэлэһэр. Куонкурус икки түһүмэҕинэн барыаҕа. Бастакы түһүмэххэ тэрийээччилэр сайаапкалары хомуйан бэрэбиэркэни ыытыахатар, иккискэ – кыайыылаахтары быһаарыахтара. Куонкурус түмүгүн эһиил ыам ыйыгар таһаарарга былаанныыллар.

Ил Дархан Айсен Николаев бэлиэтээбитинэн, Дьокуускай куорат атын киин куораттартан төһө да тыйыс усулуобуйаҕа турдар, киһи олороругар, үлэлииригэр, үөрэнэригэр бары өттүнэн табыгастаах буолуохтаах. “Бу маастар-былаан эһиил балаҕан ыйыгар Илиҥҥи экономическай форумҥа сүрэхтэниитин ааһыаҕа. Биһиги билигин киин куораппыт аны биир уонча сылынан хайдах буолуохтааҕын толкуйдуох тустаахпыт. Куорат тас көстүүлүүн уларыйыытын Дьокуускай куорат хас биирдии олохтооҕо бэйэтинэн билиэхтээх. Онон бу докумуон оҥоһуллара биһиэхэ ураты суолталаах”, – диэн иһитиннэрэр кини.

Бу куонкуруска куораты былааннааһыҥҥа үлэлэһэр Арассыыйа ханнык баҕарар хампаанньата кыттыан сөп. Кыайбыт хампаанньа Дьокуускай куораты тупсаран оҥорууга үлэлэһиэҕэ. Дьүүллүүр сүбэ састаабыгар барыта 26 киһи киирдэ. Ол иһигэр Уһук Илин, Арктика сайдыытын миниистирэ Алексей Чекунков, Уһук Илин, Арктика сайдыытын корпорациятын салайааччы Игорь Носов, Дьокуускай куорат баһылыга Евгений Григорьев, Саха сирин кылаабынай архитектора Ирина Алексеева, миниистирдэр Павел Кылатчанов, Анатолий Семенов, о.д.а. киирдилэр. Дьүүллүүр сүбэ бэрэссэдээтэлинэн Ил Дархан Айсен Николаев үлэлиэҕэ.

Аграфена КУЗЬМИНА

+1
0
+1
0
+1
0
+1
0
+1
0
+1
0
+1
0