Дьокуускай куорат маастар-былаанын оҥорор бырайыакка куорат олохтоохторуттан ыйытык кулун тутар 20 күнүгэр диэри салгыы ыытыллыа. Бу докумуон Дьокуускай куорат сайдыытын сүрүн түһүмэҕин быһаарыахтаах.
edersaas.ru
«Киин куорат 2032 сылга диэри сайдыытын туһунан Ыйаахха илии баттаабытым. Ыйаах сүрүн ыйыытынан Дьокуускайы ирбэт тоҥҥо саамай бастыҥ куоратынан оҥорорго быһаарыныы буолар. Маастар-былаан бу киэҥ хабааннаах дьаһаллары олоххо киллэрэргэ флагманскай бырайыагынан буолуоҕа. Былаан туруктаах сайдыыга эрэ буолбакка, социальнай-экэнэмиичэскэй сайдыыга, куорат эйгэтин хаачыстыбата тупсарыгар көмөлөһүөхтээх. Онуоха, уларыйыылары куорат хас биирдии олохтооҕо бэйэтинэн билиэхтээҕэ улахан суолталаах», -– диэн Саха сирин Ил Дархана Айсен Николаев бэлиэтээн эппитэ.
2021 сыл сэтинньи 17 күнүгэр Дьокуускай куорат маастар-былаанын оҥорорго бырайыак саҕаламмыта. Маастар-былааны ситиһиилээхтик оҥоруу Дьокуускай куоракка олорор уонна үлэлиир киһи кыттыыта суох кыаллыбат. Ол иһин, ыйытыылар куорат инники кыахтарын, куорат эйгэтин уонна олоҕун хаачыстыбатын, инфраструктура уонна социальнай кыһалҕалары быһаарарга хайысхаланаллар.
Ыйытыы түмүктэрэ Дьокуускай куорат маастар-былаанын оҥорууга Бүтүн Арассыыйатааҕы аһаҕас куонкурус кыттыылаахтарыгар бэриллэр тиэхиньиичэскэй сорудахтар төрүөттэринэн буолуохтара. Куонкурус олунньу 8 күнүттэн саҕаланар.
Куонкуруһу көҕүлээччи -– СӨ бырабыыталыстыбата, бииргэ үлэлэһээччилэр -– «ДОМ.РФ» АУо, Дьокуускай куорат уокуруктааҕы дьаһалтата, «СӨ Үүнэр көлүөнэ тус сыаллаах пуондата» кэммиэрчэскэйэ суох тэрилтэ. Куонкурус оператора -– «КИИН» агентство.
Ыйытыыларга кыттыһарга анкета ыйытыыларыгар хоруйданыллар.
Надежда ЕГОРОВА, «Саха сирэ» хаһыат, edersaas.ru