Вера МАКАРОВА, «Саха сирэ» хаһыат, https://edersaas.ru/
Киин куорат Пирогов аатынан уулуссатыгар уһун сыллар устатыгар эргэ дьиэҕэ үлэлээн кэлбит полиция 2 №-дээх отдела, дьэ, кэмниэ-кэнэҕэс саҥа дьиэлэннэ!
Бүгүн, ахсынньы 20 күнүгэр, Горькай уул. 90/1 нүөмэригэр («Силуэт» ателье кэннигэр, суол кытыытыгар) бу түөрт мэндиэмэннээх таас дьиэҕэ үөрүүлээх тэрээһин буолла.
Манна ис дьыала миниистирэ, полиция генерал-майора Владимир Прокопенко, миниистири солбуйааччылар, полковниктар Константин Неустроев, Александр Лукин, Дьокуускай куорат полициятын начальнига Юрий Левин, киин куорат баһылыга Айсен Николаев, Гордума бэрэссэдээтэлэ Александр Саввинов ыалдьыттаатылар.
Сахалыы алгыс сиэрэ-туома толоруллубутун кэнниттэн бастакынан миниистир эҕэрдэлээтэ. «Сулууспаҕа үчүгэй көрдөрүүлэри ситиһэр туһуттан, бастатан туран, сотрудниктар үлэлиир усулуобуйаларын тупсарыахха наада. Урукку дьиэлэрэ ханнык да нормативтарга сөп түбэспэт этэ. Билигин куорат киинигэр көһөн кэлбит дьон гражданнар ыҥырыыларыгар суһаллык көмөҕө кэлэргэ бэлэм буолуохтааххыт. Бу дьиэ Дьокуускай куорат дьаһалтатын өйөбүлүнэн үлэҕэ киирдэ», — диэн бэлиэтээн эттэ Владимир Прокопенко.
Кыһыл лиэнтэни үөрүүлээхтик кырыйыы кэнниттэн дьиэни кэрийэн көрүү буолла: дьуһуурунай чаас, дьону быстах кэмҥэ тутар камералар, кабинеттар, сынньанар хос, бэл диэтэр, душ… Барыта сырдык, ыраас.
Саҥа дьиэлэммит полиция үлэһиттэриттэн дьон быраабын харыстыырга, бэрээдэги көрүүгэ, сокуону араҥаччылааһыҥҥа үрдүк ситиһиилэри күүтэбит.
Вера МАКАРОВА, «Саха сирэ» хаһыат, https://edersaas.ru/
Ааптар хаартыскаҕа түһэриилэрэ.