Дьокуускай куорат баһылыгын таларбыт оруобуна биир нэдиэлэ хаалла. Бүгүн, кулун тутар 20 күнүгэр, киэһэ 19:00 чаастан «Сахамедиа» өрөспүүбүлүкэтээҕи медиакиинигэр Дьокуускай куорат баһылыгар хандьыдааттар икки ардыларынааҕы дебат иккис эргимтэтэ ыытылынна.
Ааспыт нэдиэлэҕэ буолбут хандьыдааттар күөн көрсүүлэрин үгүс киһи сэҥээрэ көрбүтэ. Бу сырыыга дебакка Евгений Рябченко, Виталий Обедин, Айал Прокопьев уонна Савва Михайлов кытыннылар. Уһуйааннар, оскуолалар, тырааныспар уонна дьиэ тутуутун тура кэпсэтии, санаа атастаһыыта таҕыста.
Дебаттар «Саха» НКИХ, «Якутия 24» телеханаалларынан итиэннэ edersaas.ru, ЯСИА, Yakutia-Daily.ru саайтарга көһүннэ.
Хандьыдааттар күөн көрсүүлэрин биллэр суруналыыстар Анна Фомина уонна Николай Борисов иилээн-саҕалаан ыыттылар.
Бүгүҥҥү дебаты бастакынан саҕалаабыт Евгений Рябченко быыбарга хайаан даҕаны кыайар санаалааҕын туһунан эттэ. Итиэннэ мээр да буола илигиттэн, номнуо куорат олохтоохторун кыһалҕаларын быһаара сылдьарын кэпсээтэ.
— Куорат нэһилиэнньэтин ахсаана элбээн иһэрэ үөрдэр. Тыа сириттэн көһөн кэлээччи ахсаана күн-түүн элбии турар. Ол гынан баран, уһуйааннарга, оскуолаларга миэстэ тиийбэт. Национальнай бырайыактар бааллара үчүгэй. Ол гынан баран үбү-харчыны «сиэбэттэрин» туһугар хонтуруол кытаатыахтаах. Олорор дьиэни тутууга тутааччылары хонтуруоллуохха наада. Дьиэ сыаната үрдүү турар. 2%-наах ипотека киирбитэ эрээри, «иккис» ырыынакка сыана аһара үрдээтэ, — диэн үс мүнүүтэлээх тыл этиитигэр кылгастык да буоллар, санаатын үллэһиннэ.
Сэрэбиэй быһыытынан дебакка иккис уочаратынан тиксибит Виталий Обедин:
— Сорох хандьыдааттар 40 км суолу тутуохпут, хаарбах туруктаах дьиэлэри суох оҥоруохпут диэн этэллэр. Ити дьиҥэр барыта өрөспүүбүлүкэтээҕи бырагыраамаларга киирбит дьаһаллар ээ. Өскөтүн Савва, биитэр мин мээринэн талылыннахпытына, ити 40 км суолу тутабыт, хаарбах дьиэлэртэн дьону син биир көһөрөбүт. Онон хандьыдааттар бырагыраамаларын дириҥник үөрэтэн көрүҥ. Тендердэри эрдэ ыытыахха наада. Биһиги дьоммут наар хойутаан ыыталлар. Оҕо уһуйааннарын туһунан этэр буоллахха, биһиги салалтабыт баараҕай бырайыактарынан эрэ үлүһүйэллэр. Ол оннугар оскуолалары, оҕо уһуйааннарын тутуохха, —диэн эттэ.
Салгыы Айал Прокопьев:
—Дьокуускай куорат саамай тыын суолталаах кыһалҕата — оскуоланан хааччыллыы. Оҕолор бары бастакы симиэнэҕэ үөрэниэхтээхтэр. Эбиэт кэннэ эбии үөрэхтээһининэн, араас куруһуоктарга дьарыктаныахтаахтар. 202, 203 микооройуоннар курдук кыбартааллары тутуохха наада. Онно оскуоланы, оҕо уһуйааннарын барытын былааннаныллыахтаах, — диэн Айал Афанасьевич санаатын эттэ. Үс мүнүүтэ иһигэр Айал Прокопьев этиэхтээх санаатын барытын эппэтэ. Бириэмэтэ кылгаһын ааһан, бэйэтэ арыый бытааннык саҥарар буолан, сүүйтэриилээх таҕыста.
Оттон Савва Михайлов сахалыы-нууччалыы кэпсээн, ордук сүүйүүлээхтик көһүннэ. «90-с сыллар саҥаларыгар Дьокуускай куоракка 200-кэ тыһыынча киһи олороро. Билигин лаппа элбээтибит. Онон Уһук Илиҥҥэ биһиги куораппыт нэһилиэнньэтин ахсаанынан элбии турар куоратынан буолар. Билигин официальнай чахчыларынан киин куоракка 350 тыһыынча киһи олорор. Мин атын хандьыдааттар курдук социальнай ситимнэргэ олорбоппун. Мин дьону кытары атах тэпсэн олорон кэпсэтэбин, көрсөбүн. «Боттары» кытары кэпсэппэппин. Оҕо сынньалаҥын туһунан элбэх боппуруос киирэр. 350 тыһыынча нэһилиэнньэлээх куоракка 4 эрэ музыкальнай оскуола баар. Куорат таһынааҕы бөһүөлэктэрэ оҕо кииннэрэ суохтар, — диэн иһитиннэрдэ.
Дебаттар иккис түһүмэхтэригэр өрөспүүбүлүкэ суруналыыстарыттан видеоыйытыыларга эппиэттээтилэр. Ол курдук Евгений Рябченкоҕа «Якутия 24» телеханаал дириэктэрин солбуйааччыта Дмитрий Аргуновтан сорох категория гражданнарыгар сир учаастагын анааһын, оттон Виталий Обедиҥҥа педагогическай үлэ бэтэрээнэ, суруналыыс Маргарита Винокуроваттан социальнай такси, Айал Прокопьевка yktinform.ru саайт редактора Игорь Саввиновтан дьиэ сыанатын намтатыы уонна Савва Михайловка«Кэскил» хаһыат эдэр кэрэспэдьиэниттэн ыйытыылар киирдилэр.
Салгыы дебаттары ссылканан киирэн көрүҥ: https://edersaas.ru/sahamedia-mediakiiniger-dokuuskaj-meeriger-handydaattar-debattara-sa-alanna/
edersaas.ru
+1
+1
+1
+1
+1
+1
+1