Бу ый саҥата Дьокуускай куорат Дууматын XIV уочараттаах мунньаҕын бэрэссэдээтэл Альберт Семенов салайан ыытта. Сиэссийэҕэ барыта 12 боппуруос көрүлүннэ. Мунньахха куорат баһылыга Сардаана Авксентьева, кини солбуйааччылара уонна уокурук дьаһалтатын салайааччылара кытыннылар.
edersaas.ru
Биир бастакынан 2020 уонна кэлэр 2021-2022 сылларга куорат бүддьүөтүгэр уларыйыы киириитин туһунан боппуруос көрүлүннэ. «Жилкомсервис” МУП уонна куорат кытыытынааҕы өрүс биэрэгин бөҕөргөтүү үлэтигэр эбии үп көрүлүннэ.
Билиҥҥи сокуоҥҥа сөп түбэһиннэрэн, “Дьокуускай куорат” уокурук үбэ-харчыта олохтоох бэйэни салайыныы уорганын хонтуруолугар бэриллэр уонна “Дьокуускай куорат” бүддьүөтэ” диэн балаһыанньалары мөккүөрэ суох ылыннылар.
Дьокуускай куорат дьаһалтатын Архитектура салаатын начаалынньыга, сүрүн архитектор Семен Сергеев Дьокуускай куорат Дуумата 2013 сыллаахха ахсынньы 25 күнүгэр ылыммыт 169 №-дээх “Дьокуускай куорат” уокурук сири туһаныытын уонна тутууну ыытар быраабылата” диэн аактаҕа уларытыы киллэрэр туһунан дакылаата мөккүөрү үөскэттэ. Ол курдук, элбэх этээстээх дьиэни тутарга бэриллэр сир иэнэ 4 000 кв миэтэрэттэн 2 500 кв миэтэрэҕэ диэри аччыырын элбэх дьокутаат сөбүлэспэтэ. Саҥа дьиэлэр урут ылыныллыбыт нуорманан тутуллубатахтарына, онто суох кыараан иһэр куорат сирэ-уота өссө аччыыр диэн биир санаа этилиннэ. Маннык уларытыыны дьиэ тутааччылар киллэрбиттэрин Семен Сергеев бэлиэтээн эттэ.
Тыа хаһаайыстыбатыгар анаммыт С-2А диэн сир зонатыттан «Оҕуруоту үүннэрии» диэн салааны таһаарыы уонна сорох, билигин да сууттара бүтэ илик сирдэр туһаныллар көрүҥнэрин уларытыы диэн этиилэр эмиэ элбэх боппуруоһу үөскэттилэр. Дьокутааттар бу этиилэри үөрэтэн, куорат олохтоохторун, уопсастыбанньыктары кытта кэпсэтэн баран, иккистээн көрүүгэ киллэрэргэ быһаардылар.
Дьокуускай куорат Дууматын куораты тутууга уонна архитектураҕа хамыыһыйатын бэрэссэдээтэлэ Владимир Аммосов бу боппуруоһу тутааччылары уонна куорат олохтоохторун кытта бииргэ кэпсэтэн быһаарсыахпыт диэн эттэ. Ону таһынан, Владимир Аммосов анал хамыыһыйа эрдэтээҥҥи көрүүтүгэр хаһаайыннаах уонна олорор дьиэни туттар көҥүллээх сир тоҕо “ойуур сирэ-уота” диэн статуска көһөрүн туһунан куорат салалтатын үлэһиттэрэ сатаан быһаарбатахтарын туһунан санатта.
Ити боппуруостартан ураты Улуу Кыайыы 75-с үбүлүөйдээх сылыгар аналлаах “Дьокуускай куорат” диэн анал бэлиэ бигэргэннэ.
Ньургуйаана Иванова, «Саха сирэ» хаһыат, edersaas.ru
Хаартыска куорат Дууматын пресс-кииниттэн