Дьокуускай куорат дьаһалтатын салайааччылара улуустар түмсүүлэрин кытта сүбэлэһэллэр
Мээрийэ салайааччылара улуустар түмсүүлэрин кытта сүбэлэһэллэр.
Быйыл олунньу 28 күнүгэр Дьокуускай куорат мээрэ Евгений Григорьев киин куоракка баар улуустар түмсүүлэрин кытта көрсүбүтэ. Бу көрсүһүүгэ түмсүүлэр сэбиэттэрэ уонна сүбэ бырабылыанньата тэриллибитэ. Бэҕэһээ сүбэ чилиэннэрин кытта куорат дьаһалтатын эппиэттээх салайааччылара көрсөн, ыытыллар үлэ былаанын сүбэлэстилэр.
Бу туһунан улуустар түмсүүлэрин Сүбэ бырабылыанньатын чилиэнэ, Таатта улууһун Дьүлэй нэһилиэгин дойдулаахтарын салайааччыта Иван Неустроев кэпсиир: «Улуустар түмсүүлэрин көрсүһүүтүгэр сүбэ бырабылыанньаны тэрийбиппит, ону тэҥэ хардарыта бииргэ үлэлээһин хайысхаларын торумнаабыппыт. Бэҕэһээ Дьокуускай куорат баһылыгын солбуйааччы, мээрийэ дьаһалтатын аппаратын салайааччы Руслан Тимофеев, мээрийэ тас сибээскэ уонна инвестицияларга департаменын салайааччыта Владимир Аржаков, Нерюнгри улууһуттан сүбэ чилиэнэ Вера Егорова уонна Таатта бэрэстэбиитэлэ — мин буолан көрүстүбүт. Көрсүһүүгэ бииргэ үлэлээһин тосхолун, каадыр боппуруостарын ырыттыбыт. Руслан Владимирович сүбэ бырабылыанньатын кытта бииргэ үлэлээһиҥҥэ мээрийэ өттүттэн кураторынан мээр сүбэһитэ Николай Кульбертинов сыһыарылларын эттэ», — диэн бэлиэтээтэ Иван Неустроев. Ити курдук, улуустар түмсүүлэрэ киин куорат дьаһалтатын үлэтигэр санааларын түмэллэр.
Елена ПОТОЦКАЯ, «Саха сирэ» хаһыат, edersaas.ru