РФ Силиэстийэлиир кэмитиэтин Саха сиринээҕи управлениета бэҕэһээ, бэс ыйын 7 күнүгэр, иһитиннэрбитинэн, Дьокуускай куорат баһылыгын солбуйааччы Василий Гоголевка холуобунай дьыала тэриллибитэ. Бүгүҥҥү иһитиннэриинэн, силиэстийэ кэмигэр Гоголев Силиэстийэлиир изоляторга (СИЗО) атырдьах ыйын 6 күнүгэр диэри хаайылынна.
Дьыала РФ Куттал суох буолуутун федеральнай сулууспатын Саха сиринээҕи управлениетын (УФСБ) өрөспүүбүлүкэ борокуратууратын кытта бииргэ ыыппыт бэрэбиэркэлэрин матырыйаалларыгар олоҕуран тэриллибит. РФ Холуобунай кодексатын 290-с ыст. 6-с чааһынан, ол эбэтэр, дуоһунастаах үлэһит ураты бөдөҥ кээмэйдээх бэриги ылбыт бэлиэтэ баарынан.
Силиэстийэ сабаҕалыырынан, «Дьокуускай куорат» дьаһалтатын киин куорат сирин-уотун сайыннарыыга солбуйааччыта Дьокуускайга элбэх кыбартыыралаах дьиэлэри тутуунан дьарыктанар коммерческай тэрилтэттэн тутулла турар дьиэҕэ 114 мөлүйүөн солкуобай суумалаах 1491 кв.м. иэннээх недвижимоһы бас билэр быраап иһин бэрик быһыытынан ылбыт.
Бэриги, бу дьиэни тутууга 13-тэн 16-ҕа диэри этээһи эбиигэ көҥүлү биэрии иһин, тутуу тэрилтэтин туһатыгар икки тиксэрээччи нөҥүө ылбыт. Бу тутуу тэрилтэтин хаһаайынынан уонна учредителинэн Гоголев 2018 сыллаахха диэри — муниципальнай дуоһунаска ананыар диэри — бэйэтэ этэ.
Бэс ыйын 7 күнүгэр кини уонна икки тиксэрээччитэ тутуллубуттара.
Бүгүн, ыам ыйын 8 күнүгэр, Дьокуускай куорат федеральнай суута Василий Гоголевка силиэстийэ кэмигэр хааччахтыыр миэрэ быһыытынан, Силиэстийэлиир изоляторга икки ыйга хаайарга уурда.
Оттон бэриги тиксэриигэ уорбаланааччылар ханна да барбат туһунан баппыысканан көҥүлгэ хааллылар.
Дьокуускай куорат дьаһалтатын пресс-сулууспата иһитиннэрбитинэн, силиэстийэ бара турар кэмигэр Гоголев дуоһунаһыттан туоратыллыбыт. Кини оннугар Евгений Григорьев анаммыт.
Санатан эттэххэ, Гоголев мэрияҕа ананан кэлиэр диэри «Годлайн» ООО финансовай дириэктэринэн үлэлээбит, 2013 сыллаахха «Утум-Инвест» тутуу тэрилтэтин төрүттээбит.
Кинини кытта тутуллубут бэриги тиксэрээччилэртэн биирдэстэринэн «Утум» тутуу фирматын салайааччыта Георгий Карамзин буолар.
Биһиги корр., «Саха сирэ» хаһыат, edersaas.ru
Хаартыска: интэриниэттэн.