Дьокуускай куорат 3 №-дээх балыыһата бырааһынньык күннэригэр үлэтин тохтоппот
Дьокуускайга Доруобуйа харыстабылын министиэристибэтэ тэрийбит дьуһуурунай бөлөхтөрө мэдиссиинэ тэрилтэлэрин күн аайы кэрийэр.
Бүгүн Саха сирин доруобуйа харыстабылын миниистирэ Лена Афанасьева «Дьокуускай куорат 3 №- дээх балыыһата» тэрилтэ үлэтэ уһун бырааһынньык күннэригэр хайдах үлэлии турарын бэрэбиэркэлээтэ.
Кылаабынай быраас Светлана Давыдова балыыһаҕа дьуһуурустубалар олохтоммут тэтиминэн бара туралларын туһунан эттэ. Саҥа сыл бастакы күннэригэр төлөпүөн нөҥүө 1850 сайаапка киирбит, 1418 ыҥырыы оҥоһуллубут, ол иһигэр 728 оҕолоох ыалга ыҥырыы. ОРВИ сибикилээх 351 ыарыһах, ол иһигэр 54 оҕо. Учаастактааҕы терапевтарынан барыта 294 ыарыһах чинчиллибит, ол иһигэр педиатрдар 65 оҕо доруобуйатын туругун көрбүттэр. Атын ыарыыларынан исписэлиис быраастарынан барыта 73 киһи көрүллүбүт.
Дьокуускай куорат балыыһатыгар вакцинанан быһыы хампаанньата бара турар. Ахсынньы 31 күнүттэн тохсунньу 5 күнүгэр диэри диэри 143 киһи быһыы ылбыт. Вакцинаны хас күн аайы суруйтарыыта суох Лермонтов аатынан уулусса 121 дьиэтигэр, 414 кэбиниэккэ ылахха сөп.
Миниистир Лена Афанасьева тэрилтэ баһаартан сэрэхтээх буолуу систиэмэтин, техническэй уонна харабыллыыр сулууспалар үлэлэрин сыныйан бэрэбиэркэлээтэ уонна тургутуу түмүгүнэн, балыыһа үлэтин бүгүҥҥү туругун үрдүктүк сыаналаата.
«Саха сирэ» хаһыат, edersaas.ru