Дьокуускай куорат сорох кылаастарын олоҕурбут көрүҥүнэн үөрэтэри былаанныыллар
Бүгүн Дьокуускай куорат үөрэҕин управлениетын начаалынньыга Алексей Семенов социальнай ситиминэн быһа сибээскэ тахсан төрөппүттэр, учууталлар, уопсастыбаннас ыйытыытыгар хоруйдаата.
edersaas.ru
Быһа сибээс кэмигэр Алексей Семенов: “Быйылгы үөрэх дьылыгар 49,5 тыһыынча оҕо үөрэнэр, уһуйааҥҥа сылдьар. Бу ааспыт сылы кытта тэҥнээн көрдөххө, 3 тыһыынчанан элбэх.
Оҕолор икки нэдиэлэ устата үс көрүҥүнэн үөрэннилэр. Алын кылаас оҕолоро олоҕурбут көрүҥүнэн оскуолаҕа миэстэтигэр тиийэн үөрэммиттэрэ. Үс оскуолаҕа 5 кылаас харантыыҥҥа олорор.
Балаҕан ыйын 21 күнүттэн 5-с, 9-11-с кылаас үөрэнээччилэрин олоҕурбут көрүҥүнэн үөрэтиигэ (очно) көһөрөргө былаанныыбыт. Бу 13,5 тыһыынча оҕо буолар. Оччотугар оскуолаҕа миэстэтигэр тиийэн быһа холоон 30 тыһыынча кэриҥэ оҕо үөрэниэҕэ” – диэн хоруйдаата.
Итини сэргэ, алын кылаастар бөлөхтөргө арахсыбакка, кылааһынан бары бииргэ үөрэниэхтэрэ диэн эттэ.
Людмила ПОПОВА, “Саха сирэ” хаһыат, edersaas.ru