Дьокуускай куорат 2-с оскуолатын 10-c кылааһа “Звездный класс” куонкуруска бастаата
Үһүс сылын “Звездный класс” куонкурус үрдүк таһымнаахтык ыытылынна. Дьүүллүүр сүбэ быһаарыытынан, Гран-при хаһаайынынан Дьокуускай куорат 2-с нүөмэрдээх национальнай политиэхиньиичэскэй оскуолатын 10-с “А” кылааһа буолла.
Куонкурус Дьокуускай куорат оскуолаларын икки ардыларыгар “Айылгы” киин уонна Оҕо айымньытын дыбарыаһын тэрийиилэринэн ыытыллар. Быйылгы куонкурус Кыайыы 75 сылыгар ананна. Үгэс быһыытынан түөрт түһүмэҕинэн (ырыа, үҥкүү, фольклор, муода) барда. Тэрийээччилэр иһитиннэрбиттэринэн, уопсайа, 39 кылаас, 999 оҕо кыттыбыт.
Биирдии-иккилии мүнүүтэнэн быысаһан, бииртэн-биир чаҕылхай нүөмэрдэр кутуллан тахса тураллар, тахса тураллар… Таҥастара-саптара мааныта, тиэмэлэригэр сөп түбэһэрэ, муодаҕа көннөрүү сэрии сылларын саҕанааҕы кэмтэн саҕалаан, байыаннай таҥаска, авангардка тиийэ, букатын саҥаттан-саҥа уобарастар айыллан иһэллэр. Манна көстөр – учуутал кылааһы салайар дьоҕура, оҕолор түмсүүлэрэ, кыахтара, төрөппүт көмөтө…
“Муода” түһүмэҕин дьүүллүүр сүбэтин чилиэннэрэ Кыайыы 75 сылыгар аналлаах чаҕылхай нүөмэрдэри көрбүттэрин этэллэр. Экологияҕа, кыайыыга аналлаах кэллиэксийэлэри чорботон бэлиэтииллэр. Мода бары быраабылатын тутуһан туруорбуттарын ыйаллар.
“Айылгы” киин мэтэдииһэ Вера Коротких: “Куонкурус, харантыын кэнниттэн тута ыытыллыбыт буолан, кыттааччыта аҕыйах. Былырыын балтараа тыһыынча кэриҥэ оҕо хабыллыбыта. Быйыл Гран-при аатын ылбыт 2-с нүөмэрдээх оскуола 10-с “А” кылааһын үөрэнээччилэрэ чахчы чаҕылхайдар. Бэлэмнэммиттэрэ ырааппыт. Биһиги куонкуруспутугар кылаас үлэтигэр төрөппүт түмсүүтэ улахан оруоллаах. Учуутал төрөппүттэрин түмэр буоллаҕына тугу баҕарар, ханна баҕарар кыайар кыахтаахтар. Төрөппүттэр даҕаны итини бэлиэтииллэр”, — диэн этэр.
Ити курдук, түөрт күүстээх түһүмэх кэнниттэн “Звездный класс-2020” (Гран-при) үрдүк ааты Дьокуускай куорат 2-с нүөмэрдээх оскуолатын 10-с “А” кылааһын кэлэктиибэ (кылаас салайааччыта Екатерина Васильевна Оконешникова) ылла. “Звездный музыкальный руководитель-2020” номинацияны Галина Алексеевна Семячкина, “Звездный классный руководитель-2020” номинацияны Дьокуускай куорат 2-с нүөмэрдээх оскуолатын 4-с “В” кылааһын салайааччыта Ньургуйаана Степановна Теплоухова туттулар.