Дьокуускай куоракка оҕо үҥкүүтүн аан бастакы испэктээгин премьерата буолла

Ааптар: 
Бөлөххө киир:

А.Е. Кулаковскай – Өксөкүлээх Өлөксөй аатынан норуоттар доҕордоһууларын дьиэтигэр “Бриллианты Якутии” оҕо үҥкүүтүн ансаамбыла “Халлаан бэлэҕэ” диэн испэктээги көрдөрүүгэ таһаарда. Бу юкагир остуоруйаларыгар олоҕурбут сырдык-ыраас санааны хоһуйар, үтүө-хорсун быһыыны айхаллыыр, кэрэҕэ уһуйар бэртээхэй авторскай туруорууну оҕолор бэйэлэрэ үҥкүүлээн, саҥаран-иҥэрэн оонньообуттара олус сэргэх буолла.

edersaas.ru

Сиэдэрэй декорацияҕа араас өҥнөөх дьэрэкээн көстүүмнэрдээх 3 саастаах кырачаан оҕоттон саҕалаан 15-гэр тиийэ саастаах сүүстэн тахса үҥкүүһүт эриэккэстик үҥкүүлээн, талааннаахтык оонньоон, сэдэх муусукалаах хотугу омук аптаах эйгэтигэр угуйдулар. Манна таба иитиитэ, балыктааһын хотугу киһиэхэ суолтата, киһи айылҕаны кытта быстыспат ситимэ, хара дьайы кыайар үтүө күүһэ сэһэргэннэ.

Бу аптаах испэктээги СӨ искусствотын үтүөлээх диэйэтэлэ Александр Титигиров режиссердаан, РФ уонна СӨ үтүөлээх артыыһа, ансаамбыл салайааччыта Афанасий Соловьев туруоран, СӨ култууратын туйгуна, худуоһунньук Марьяна Оконешникова декорациятын, көстүүмнэрин айан, история билимин кандидата Людмила Жукова сүбэлээн, юкагир ырыаларын ааптардара Ирина Дускулова, Татьяна Бандерова муусукаларын киллэрэн туруордулар. «Бриллианты Якутии» оҕо үҥкүүтүн ансаамбылын салайааччылара РФ уонна СӨ үтүөлээх артыыстара Зоя уонна Афанасий Соловьевтар, СӨ култууратын туйгуна, хореограф Валерия Платонова, актер маастарыстыбатын педагога Айыллаана Иванова уонна оҕолор, төрөппүттэр сүдү үлэлэрин биир түмүгэ буолла.

Оҕо үҥкүүтүн испэктээгэ Дьокуускай куоракка аан бастакытын турда. Бу эт-хаан нарын хамсаныытын көрдөрүү эрэ буолбакка, оҕо дьоҕурун хас да араҥатын арыйар дириҥ ис хоһоонноох үлэ, ансаамбылы саҥа таһымҥа таһаарда.

Вилюяна НИКИТИНА.

+1
0
+1
0
+1
0
+1
0
+1
0
+1
0
+1
0