Дьокуускай куоракка гаас «кыраанын» тоҕо саба туттулар?

Бөлөххө киир:

Ааспыт нэдиэлэҕэ Дьокуускай куоракка 60-70 сыллардаахха тутуллубут элбэх кыбартыыралаах 13 дьиэҕэ гааһы биэриини тохтотон (ас астыырга туһаныллар билиитэлэргэ) олохтоохтору соһуттулар. Олохтоохтор «Сахатранснефтегаз» ААУо гааһы көрөр-истэр управлениетыгар тиийэн, тоҕо араарбыттарын ыйыталаһан, айдааны тарпыттар. Быйыл саас Дьокуускай куоракка Халтурин уулусса 61 №-дээх дьиэтигэр гаас үлэһиттэрэ техническэй көрүүнү оҥоро сылдьан, ваннай хос иһинэн ааһар гаас ситимэ дьэбиннирэн турарын булан, дьиэ үрдүнэн гаас бэриллэрин тохтоторго күһэллибиттэрэ.

Тустаах тэрилтэ гааһы көрөр-истэр управление начаалынньыга Антон Томскай:

«Куттал суох буолуутун хааччыйар сыалтан гааһы араардыбыт. Элбэх кыбартыыралаах эргэ дьиэлэр гаастарын ситимэ, оборудованиелара техническэй өттүнэн хайдах туруктаахтарын билэр анал бэрэбиэркэ оҥоһуллуохтаах. Ити оҥоһулуннаҕына эрэ сөптөөх быһаарыныыны ылыахпыт. Бу туһунан куорат дьаһалтатыгар эппиппит ыраатта. Бүгүн гаас оборудованиета аһара эргэрбит 482 дьиэттэн баара-суоҕа 16-гар эрэ бэрэбиэркэни ыытар туһунан дуогабар түһэрсиллибит. Онон сөптөөх миэрэни ылар уолдьаста. Дьиэ олохтоохторо өйдүөхтэрэ диэн эрэнэбит», — диэн быһаарар.

Манна даҕатан эттэххэ, соторутааҕыта Иваново куоракка элбэх кыбартыыралаах дьиэҕэ гаас ситимэ эстэн, алта киһи суорума суолланна, 9 киһи эт-хаан эчэйиитин ылла. Сүрүн төрүөтэ биллэр – гаас ситимэ аһара эргэрбит.

Эргэ дьиэлэргэ гаас ситимэ бэрэбиэркэлэниэхтээҕин туһунан боппуруоһу «Сахатранснефтегаз» ААУо гааһы тарҕатар управлениета былырыыҥҥыттан көтөҕөр эрээри, ити өттүгэр күттүөннээх үлэ ыытылла илик. Дьокуускай куорат үрдүнэн 1360 элбэх кыбартыыралаах дьиэ баарыттан 482-тэ 30-тан тахса сыллааҕыта тутуллан үлэҕэ киирбит тутуулар. Бу үксэ «хрущевкалар», «КПД-лар».

Бэрэбиэркэни ким тэрийиэхтээҕий? Гаас ситимин туругун бэрэбиэркэлээһиҥҥэ бүддьүөттэн үп көрүллүбэт. Бэрэбиэркэни дьиэни көрөр-истэр салайар хампаанньалар тэрийиэхтээхтэр. Итини тэҥэ, СӨ элбэх кыбартыыралаах дьиэлэри өрөмүөннээһиҥҥэ пуонда үбүнэн көмөлөһүөн сөп этэ даҕаны, бу диэн чуолкайдык быһаарылла илик курдук. Пуонда көмөлөспөт түгэнигэр кыбартыыра хаһаайыттара харчынан кыттыһан бэрэбиэркэлэтиэхтэрин сөп эрээри, өрөмүөҥҥэ төлүү олорон, кыттыһаллара саарбах. Холобур, түөрт мэндиэмэннээх, түөрт подъезтаах КПД-ны бэрэбиэркэлииргэ, ортотунан, 300 тыһ. солк. наада. Холобур, 50 кыбартыыра хаһаайыныгар 300 тыһ. солк. түҥэттэххэ, 6 тыһ. солк тиксэр. Ол эрээри, кыбартыыра хаһаайыннара гаас ситимэ эргэрбитигэр буруйдара суох.

 Бэрэбиэркэлээн баран, араарбыттара буоллар.

13 дьиэҕэ гаас ситимэ араарыллыбытын кэнниттэн сыл бүтүөр диэри 60 эргэ дьиэ уочаракка турар. Бу дьиэлэргэ гаастарын оборудованиелара син сэнэх буолуохтарын сөп. Барыларын аҥар кырыы араарар сатамньыта суох буолуо. Хамыыһыйа тэриллэн, испииһэккэ киирбит эргэ дьиэлэри хат көрүөхтээх. Ол курдук, чахчы эргэрбит ситимнээх дьиэлэри бастакы уочарат өрөмүөннүөххэ наада. Икки, үс сыл туруон сөптөөхтөрү күүттэрэн эриэххэ сөп. Ол гынан баран, «Сахатранснефтегаз» уһаппакка-кэҥэппэккэ «кырааны» саба тутан, кытаанах миэрэни ылбыта биир өттүнэн сөп. Өскөтүн, саахал тахсар түгэнигэр буруйдаах гаас хампаанньата буолар. Билигин бу боппуруос Дьокуускай куоракка сытыытык туран, салайар хампаанньалартан (УК) саҕалаан манна сыһыаннаах тэрилтэлэр бары кыттан эрэллэр.

Салайааччылар этиилэрэ

Уопсай хамыыһыйа быһаарыллан эрэр

«Дьокуускай куорат» уокуругун баһылыгын хаһаайыстыбаннай боппуруоска 1-кы солбуйааччы Дмитрий Садовников:

40-ча сыллааҕыта туруоруллубут гаас ситимэ, оборудованиелар эргэрэн тураллара биллэр. Бу сааскыттан ити боппуруос көтөҕүллэр. Салайар хампаанньалар, олорор дьиэ табаарыстыбалара

гаас ситимигэр бэрэбиэркэни ыытыахтаахтарын туһунан барыларыгар тиэрдибиппит. Олохтоохторго өйдөтүү үлэтин ыытабыт. СӨ элбэх кыбартыыралаах дьиэ пуондатын кытары эмиэ кэпсэтии бара турар. Бу боппуруос куорат мэрэ Айсен Николаев кыттыылаах мунньахха эмиэ көрүллүбүтэ. Онно СӨ ОДьКХ уонна энергетикэҕэ министиэристибэтигэр маны быһаарарга уопсай хамыыһыйа тэрийиэххэ диэн этии киллэрбиппит да, билигин ол быһаарылла илик.

Салайар хампаанньалар эбээһинэстэрэ

СӨ элбэх кыбартыыралаах дьиэни өрөмүөннүүр пуонда генеральнай дириэктэрин солбуйааччы Петр Макаров:

Былырыын пуонда үбүнэн 7 эргэ дьиэ гааһын ситимэ өрөмүөннэммитэ. Быйыл былааҥҥа 3 дьиэ турар. Эһиил 43 дьиэни хабыахтаахпыт. Бу эрдэ былааҥҥа киирбит дьиэлэр буолаллар. Оттон гаас ситимин техническэй өттүнэн бэрэбиэркэлээһини салайар хампаанньалар ыытыахтаахтар. Кинилэр эбээһинэстэрэ буолар.

+1
0
+1
0
+1
0
+1
0
+1
0
+1
0
+1
0