Сүрүн

Дьокуускай куоракка дьиэ кэргэттэр сэлэлээн хаамтылар

Бүгүн Дьокуускай куоракка Арассыыйатааҕы Дьиэ кэргэн, таптал уонна бэриниилээх буолуу күнүгэр анаммыт аан бастаан дьиэ кэргэттэр сэлэлээн хаамыылара буолла.

Тэрээһин Саха АССР тэриллибитэ 100 уонна Саха сиригэр Ийэ сылларыгар ананна. Сэлэлээн хаамыыга сахалыы таҥастаах кэрэчээн кырачааннардаах, мааны бэйэлээх эбэлээх, эһэлээх дьоллоох  дьиэ кэргэттэр,

тапталга уратытык билиммит эдэр ыаллар, “Үрүҥ көмүс волонтердар” уопсастыбаннай тэрилтэ, элбэх оҕолоох ыаллар, киин куорат уокуруктара  уо.д.а. бэрт үгүс уопсастыбаннай хамсааһыннар кыттыыны ыллылар.

Олус тэрээһиннээх, элбэх киһи кыттыылаах параад  хайдах эрэ  сааскы Пиэрибэй Маайы санатта.

СӨ Үлэҕэ уонна социальнай сайдыыга миниистирэ Елена Волкова салайар министиэристибэтин үлэһиттэрин кытта бу хаамыыга кытынна.

— Бүгүҥҥү бэрт элбэх ыал кыттыылаах  бэртээхэй тэрээһин Дьокуускайга аан бастаан ыытылынна.

Бу сэлэлээн хаамыынан биһиги Дьиэ кэргэн бастакы өрөспүүбүлүкэтээҕи бэстибээлин арыйдыбыт.

Маннык элбэх дьону түмпүт дьиэ кэргэттэр сэлэлээн хаамыылара үгэс быһыытынан салҕанарыгар баҕарабыт. Ол  бастакы олуга бүгүн уурулунна, — диэн баран, дьиэ кэргэттэри өйүүр  демография кэмпириэнсийэтэ буола турар Владивосток куоратыгар эстэпиэтэни туттарда.

Дьиэ кэргэттэр сэлэлээн хаамыылара Уһук Илин уонна Арктика Бүтүн Сойуустааҕы VII демографическай кэмпириэнсийэтигэр ананна.

 

Елена ПОТОЦКАЯ, «Саха сирэ» хаһыат.

Ааптар хаартыскаҕа түһэриитэ уонна видеота.

 

 

1
0
Telegram Whatsapp