Дьокуускай киин уулуссаларын ыраастааһын, дьаамаларын өрөмүөннээһин сотору саҕаланыаҕа

Муус устар ортото буолла. Ол аата сандал күннээх Маай бырааһынньыга чугаһаата. «Главстрой» МКУ иһитиннэрбитинэн, муус устар бүтүүтэ Дьокуускай куоракка быйыл өрөмүөннэниллиэхтээх уулуссалары ыраастааһын саҕаланыаҕа. Бөх-сах ыраастаныллыаҕа, уулуссалары кыйа барар күрүө-хаһаа оҥоһуллуоҕа, суол бэлиэлэрэ саҥардыллыахтара. 

Александр ТАРАСОВ, «Саха сирэ» хаһыат, https://edersaas.ru
Быйыл Чиряев (Дзержинскэй – Хабаров учаастага), Кулаковскай (Чернышевскай – Ленин учаастага), Жорницкай (С. Данилов – Объездной шоссе учаастага), Петр Алексеев (Лермонтов – Пирогов учаастага), Ломоносов (Петровскай – Октябрьскай учаастага), Чернышевскай уонна Хабаров (Кулаковскай – Чиряев учаастага), Кальвица (Дзержинскэй – Жорницкай учаастага) уулуссаларга хапытаалынай өрөмүөн ыытыллыаҕа. Итини тэҥэ, Уткин аатынан уулусса саҥардыллан оҥоһуллуоҕа. Медицинскэй кииҥҥэ киирэр уулусса (Гимеин) медицинскэй киин пуоһугар диэри өрөмүөннэниллиэҕэ. Быйыл балаҕан ыйын 1 күнүгэр диэри 6,644 км уһуннаах уулусса оҥоһуллуоҕа.
Алтынньы бүтүөр диэри Кальвица-Пирогов-Жорницкай быһа охсуһуулара, Окружной шоссе (Өктөөп 50 сыла автострада – Жорницкай учаастага), Хатыҥ Үрэх шоссе (Объездной шоссе – Курнатовскай учаастага) оҥоһуллуохтара. Итини тэҥэ, Автодорожнай, Халтурин, Билибин, Дежнев, Каландаришвили, Кузьмин, Стадухин уулуссалары саҥардан оҥоруу барыаҕа. Дьокуускай куорат хаһаайыстыбатын сулууспата муус устар бүтүүтүттэн уулуссаларга дьааманы өрөмүөннээһини саҕалыаҕа.
Владимир Аммосов, тупсаран оҥоруу отделын начаалынньыга:
– Дьаамалары өрөмүөннээһин бастаан утаа киин уулуcсаларга ыытыллыаҕа. Маай бырааһынньыктарын иннинэ киин уулуссаларга үлэ ыытыллан түмүктэниэхтээх. Куорат уокуруктара ханнык уулуссаларга дьаамалары өрөмүөннээһин ыытыллыахтааҕын испииһэктээн киллэрбиттэрэ.

Александр ТАРАСОВ, «Саха сирэ» хаһыат, https://edersaas.ru