Бүгүн 18:00 чаастааҕы дааннайдарынан, Дьокуускай баһылыгын быыбарыгар 75 тыһыынча киһи куоластаабыт. Бу уопсай быыбардааччы ахсааныттан 38%-а буолар диэн Дьокуускайдааҕы быыбардыыр хамыыһыйа бэрэссэдээтэлэ Алла Самойлова иһитиннэрэр.
«20:00 чаас дааннайын түмүгүнэн бу дьон ахсаана өссө элбиэҕэ. Билигин 122 быыбардыыр учаастак куоластааһын түмүгүн таһаарар. Манна быыбардааччылар испииһэктэрин көрөллөр, сейф-пакеттары, стационарнай уонна көһө сылдьар дьааһыктары арыйаллар», — диэн Алла Самойлова этэр. Кини этэринэн, 22:00-23:00 чаас диэки учаастактартан бастакы боротокуоллар уокуруктааҕы дьаһалтаҕа тиксэриллиэхтэрэ.
Быыбар хаамыытын үс күн устата 500-тэн тахса кэтээн көрөөччү көрдө-иһиттэ. Кэтээн көрөөччүлэринэн хандьыдааттар уонна баартыйалар бэрэстэбиитэллэрэ үлэлээтилэр. Кинилэр учаастактартан куоластааһын түмүгүн, хандьыдааттарга хастыы куолас киирбитин боротокуолларын ылыахтарын сөп.
Дьокуускай киин өттүн олохтоохторо быыбарга көхтөөхтүк, оттон ГРЭС, 17-с кыбартаал олохтоохторо көҕө суохтук кыттыбыттар диэн бэлиэтииллэр.
«Куорат таһынааҕы бөһүөлэк олохтоохторо олус көхтөөхтөр», — диэн Алла Георгиевна иһитиннэрдэ.
Алла Самойлова телеграм-ханаалларга тарҕаммыт сорох учаастактарга олохтоохтор 100% быыбарга кыттыбыттарын туһунан сонуну чопчулаан биэрдэ. Кини этэринэн, түөрт учаастак быстах кэмҥэ олорор сирдэргэ тэриллибит. Манна хас киһи олорор да, соччо куолас киирбитин ыйда. Бу 813-с, 818-с, 819-с уонна 820-с учаастактар буолаллар.
ХИФУ оройуонугар куоластааһын, үгэс быһыытынан, улахан көрдөрүүлээх. Манна быыбардааччы испииһэгэ үксэ устудьуоннартан турар.
edersaas.ru
Хаартыска — СИА.