Куорат эйгэтин тупсаҕай оҥорууга ылыныллыбыт муниципальнай бырагыраама чэрчитинэн, үлэ хайдах баран иһэрин Дьокуускай куорат дьаһалтата көрдө-иһиттэ. Бу туһунан куорат уокуруктааҕы дьаһалтатын уопсастыбаннаһы уонна иһитиннэрэр-биллэрэр маассабай сириэстибэлэри кытары үлэҕэ департамена суруйар.
Дьокуускай куорат Дууматын быһаарыытынан, куорат эйгэтин тупсаҕай оҥорууга туһуламмыт муниципальнай бырагырааманы олоххо киллэриигэ бүддьүөттэн 38 мөл.солк. учуоттаммыт. Можайскай уул. 19/1 тэлгэһэтигэр тротуардар, массыына суола аспаалланнылар, бордюрдар оҥоһулуннулар. Бэдэрээччиттэр бу нэдиэлэҕэ уулусса уотун тирэҕин, ыскамыайкалары, бөх-сах быраҕар анал иһиттэри оҥоруохтаахтар диэн иһитиннэрэллэр. Маны сэргэ, 12 км Сэргэлээх суолун 7, 7/1, Птицефабрика, 8 тиэргэннэр тупсарыллаллар. Сирэ-уота, суола-ииһэ нэдиэлэ устатыгар аспаалланыахтаах. Сэргэлээх суолугар оҕо оонньуур саҥа былаһаакката Дьокуускай куорат уокуруктааҕы дьаһалтатын «Норуот бүддьүөтэ» бырайыагын чэрчитинэн, олохтоохтор кыттыылаах тутулла турар. Лермонтов, 115, 117, 119, тиэргэннэрин тупсарыы үлэтэ бэдэрээччити кытары хантараак быһыытынан балаҕан ыйыгар саҕаланыахтаах. Үлэһээччи “Служба эксплуатации городского хозяйства” МКУ. Суруйалларынан, бырагыраама чэрчитинэн ыытыллыбыт үлэлэр куорат төрөөбүт күнүгэр туттарыллыахтаахтар.
Маны таһынан, эргэрбит суолу өрөмүөннээһин чэрчитинэн, Можайскай уул. 2 №-дээх өрөспүүбүлүкэтээҕи балыыһа уонна Свердлов уул.онкологическай диспансер суолугар-ииһигэр сылдьыбыттар.