Дьокуускай куоракка онкология киинин тутуу федеральнай бүддьүөккэ киирдэ
Бу туһунан Саха Өрөспүүбүлүкэтин Ил Дархана Айсен Николаев алтынньы 24 күнүгэр социальнай ситим нөҥүө биллэрдэ.
Ил Дархан алтынньы ый саҕаланыытыгар 2020-2022 сс. Арассыыйа бүддьүөтүн ылынар Федерация Сэбиэтин парламенын кэпсэтиитигэр, Өрөспүүбүлүкэҕэ онкология киинин иккис уочаратын тутуу үбүн 2020 сыл буддьүөтүгэр киллэрэр туһунан тыл эппитэ. Онно Айсен Николаев этиитин Федерация Мунньаҕын Сэбиэтин бэрэссэдээтэлэ Валентина Матвиенко өйөөбүтэ. “Бүгүн сарсыарда, Валентина Матвиенко эрийэн, онкология киинин иккис уочаратын тутуу 2020 сыл федеральнай бүддьүөтүгэр киирбитинэн эҕэрдэлээтэ. Арассыыйа бүддьүөтүттэн онкология киинин тутууга уопсайа 5,9 миллиард солкуобай 2020-2023 сс. киириэҕэ”, — диэн Ил Дархан инстаграм-страницатыгар суруйда.
Өрөспүүбүлүкэ бэйэтин бүддьүөтүнэн 210 киһи тэҥинэн көрдөрөр поликлиникалаах, 180 сытар миэстэлээх, радиология, хаһаайыстыбаннай салаалардаах онкология киинин тута турар. Өрөспүүбүлүкэҕэ сыл аайы 2 тыһ. кэриҥэ искэн ыарыылаах ыарыһах эбиллэр. 2019 сыл тохсунньу 1 күнүнээҕи туругунан учуокка 11 тыһ. 995 искэн ыарыылаах турар. Искэн ыарыылаах ахсаана 10 сыл түмүгүнэн 17,6 % төгүл элбээбит.
Хас да сыл тухары сатаан быһаарыллыбакка турбут онкология киинин тутуллуута быһаарыллыбытын иһин Ил Дархан Валентина Матвиенкоҕа, РФ бырабыыталыстыбатын бэрэссэдээтэлин бастакы солбуйааччытыгар Антон Силуановка, Саха сириттэн Судаарыстыбаннай Дуума дьокутааттарыгар уонна Федерация Сэбиэтин чилиэннэригэр, Арассыыйа доруобуйатын харыстабылын министиэристибэтигэр уонна бу боппуруоска үлэлиир хамаандатыгар махталын тириэртэ.
СИА