Дьокуускай баһылыгын быыбарыгар 75 085 киһи кытынна (18:00 чаастааҕы дааннайдар)
Бүгүн, кулун тутар 28 күнүгэр, 20:00 чааска Дьокуускай куорат баһылыгын быыбарыгар куоластааһын түмүктэннэ.
Испииһэккэ киирбитинэн, 199 561 куоластааччы баар. Бүгүн 18:00 чаастааҕы дааннайдарынан, 75 085 киһи быыбарга көхтөөх кыттыыны ылбыта биллэр. Маны бырыһыаҥҥа таһаардахха, 37,63% буолар диэн Дьокуускай куорат быыбардыыр хамыыһыйатын саайтыгар иһитиннэрбиттэр. Билигин быыбардыыр учаастактар сабылланнар, куолаһы ааҕыы үлэтэ саҕаланна.
Хаартыска — ysia.ru
Устуоруйаны сэгэттэххэ, 2007 сыллаахха Дьокуускай олохтоохторо баһылыгынан Юрий Заболевы талбыттара. Биэс сыллаах болдьоҕун ситэ түмүктээбэккэ, Юрий Вадимович 2011 сыл ахсынньытыгар астаапкаҕа барбыта.
Хаартыска — pnp.ru
Онон 2012 сыллаахха кулун тутар 4 күнүгэр Дьокуускай баһылыгын быыбара буолбута. Манна быыбардааччы 47,73 % куолаһын ылан, «Биир Ньыгыл Арассыыйа» баартыйа туруорбут хандьыдаата Айсен Николаев кыайыылаах тахсыбыта. 2017 сыллаахха «Биир Ньыгыл Арассыыйа» баартыйа ыыппыт праймериһигэр Айсен Николаев 86% куолаһы ылары ситиспитэ. Ол сыл күһүнүгэр быыбардааччы 68,4 %-на эмиэ кини диэки буолан, Айсен Сергеевич киин куорат баһылыгынан иккистээн талыллыбыта. Оттон 2018 сыллаахха ыам ыйыгар РФ Бэрэсидьиэнин Владимир Путин ыйааҕынан СӨ баһылыгын эбээһинэһин быстах кэмҥэ толорооччунан ананан, киин куорат баһылыгын дуоһунаһыттан тохтообута.
Хаартыска — ysia.ru
Ол кэнниттэн 2018 сыллаахха ыытыллыбыт быыбарга «Партия Возрождения России» баартыйаттан Сардаана Владимировна Авксентьева баһылыкка хандьыдаатынан турбута. Киниэхэ Дьокуускай 32 911 (39,98%) олохтооҕо куоластаан, киин куорат баһылыгынан талбыттара. Сахабыт сирин устуоруйатыгар аан бастаан Дьокуускай куорат мээринэн кэрэ аҥаар талыллыбыта. Үгүс дьоҥҥо эрдэттэн күүтүллүбэтэх соһуччу түгэн тахсыбыта.
edersaas.ru
Хаартыска — yagtik.ru