Буолаары буолан, киһи элбэҕэр, дьон көрөн турдаҕына. Уоруйах эмсэҕэлээччи атаһа буолан кубулунан, дьон кинини уорбалыы көрбөтөх.
Ол курдук, Дьокуускай куорат полициятын дьуһуурунай чааһыгар эдэр киһи кэлэн, суотабай төлөпүөнүн уонна 15 тыһ. солк. сыаналаах наушнигын уордарбытын туһунан сайабылыанньа суруйбут.
Полицейскайдарга быһаарбытынан, кини итирэн баран автовокзалга олордоҕуна, биир киһи кэлэн аттыгар олорбут уонна дьон көрөрүгэр доҕоро буолан кубулунан, сыыйа наушнигын, онтон төлөпүөнүн ылан барбыт.
Малларын уордарбытын бу киһи сарсыныгар өйдөнөн баран биирдэ билэн, дьэ, «бабат» диэбит. Уонна тута полицияҕа сүүрбүт.
Полиция оперативниктара уорууга уорбаланааччыны туппуттар — урут уорууга түбэһэн сууттана сылдьыбыт 49 саастаах киһи эбит.
Буруйун билиммит уонна уорбут малларын 1000 солк. атыылаабытын, ол харчынан арыгы атыыласпытын туһунан көрдөрүү биэрбит.
Бу чахчынан «Уоруу» ыстатыйанан (2-с чааһа) холуобунай дьыала тэриллибитин туһунан СӨ ИДьМ-тын пресс-сулууспата иһитиннэрдэ. Бу ыстатыйанан накаастабыл миэрэ — 5 сылга диэри болдьоххо көҥүлү быһыы.
Полиция мэлдьи сэрэтэр: итирик киһи бэйэтэ да бэрээдэги, сокуону кэһиэн сөп биитэр буруй сиэртибэтэ да буолуон сөп. Улаханнык итирэн баран, онно-манна барбатах, таһырдьа тахсыбатах ордук.
Биһиги корр., «Саха сирэ» хаһыат, edersaas.ru
Хаартыска уонна видео: СӨ ИДьМ-тын пресс-сулууспата.