Дьокуускай авиапордугар өрөмүөн үлэтэ алтынньы 1 күнүгэр диэри түмүктэниэҕэ
Билигин Дьокуускай куорат авиапордун балаһаларын өрөмүөннээһин үлэтэ күүскэ бара турар. Барыта былаан быһыытынан бардаҕына, алтынньы 1 күнүгэр диэри өрөмүөн үмүрүтүллүөҕэ. Бу туһунан бүгүн СӨ Тырааныспар уонна суол хаһаайыстыбатын миниистирэ Владимир Сивцев суруналыыстарга иһитиннэрдэ.
«Бу боппуруоһу кытаанах хонтуруолга тутабыт. Бүгүҥҥү туругунан, 625 м уһуннаах балаһаҕа бетоннааһын үлэтэ түмүктэннэ. Пандустары туруордулар. Манна биир нэдиэлэ курдук кыраапыктан хаалан иһии баара. Алтынньы 1 күнүгэр диэри Ростехнадзор анал быһаарыытын уонна Росавиация сэртипикээтин ылыахтаахпыт», — диэн Владимир Сивцев иһитиннэрдэ.
Санатар буоллахха, бүгүҥҥү күҥҥэ Дьокуускай авиапордугар 1628 м уһуннаах балаһатыттан Boeing 737-700, А319 уонна Embraer-170 LR диэн сөмөлүөттэр эрэ көтөллөр. Биллэн турар, соҕотох балаһа үлэлиирэ авиа-көтүү бытаарыытыгар тиэрдэрэ чуолкай суол. Ол эрээри, атын балаһалар оҥоһуллаллара хайаан да наада. Ол бастакы уочарат салгын ааллара көтөллөрүгэр-түһэллэригэр куттал суох буолуутун хааччыйар.