Бүгүҥҥүттэн «Дьокуускай-Аллараа Бэстээх» хайысханан эбии биэс паром сылдьыаҕа. Бэс ыйын 4 күнүттэн “Даркылаах” тиксиитигэр массыыналары уочараттатар “накопитель” үлэлиэҕэ. Бу туһунан СӨ тырааныспарга уонна суол хаһаайыстыбатыгар миниистирэ Владимир Сивцев иһитиннэрдэ.
— Билиҥҥи туругунан, өрүһү туоруурга уопсайа тоҕус паром үлэлиир. Онтон үһэ таһаҕас тиэйэр массыыналарга анаммыт. Бүгүн биир паром эбиллиэҕэ, онтон өрөбүлгэ-бэнидиэнньиккэ эбии түөрт паром үлэлии тахсыаҕа, — диэн миниистир иһитиннэрдэ.
Миниистир бэлиэтииринэн, быйыл өрүс суола «Дьокуускай-Аллараа Бэстээх» хайысханан арыый хойутаан үлэлээбит. Ити өрүс мууһа хойутаан ааһан, «Даркылаах» тиксиитэ уунан туолбут. Онон “Даркылаах” тиксиитигэр кумах кутан, уот холбонон тырааныспардар халҕаһаларын бэрээдэктиир “накопитель” аһылларын иһитиннэрдэ.
Ульяна ЗАХАРОВА.