Дьокуускайга кэнники сылларга дьиэлэр тэллэй курдук үүнэр буоллулар. Араас кыбартыыра атыыга тахсар. Дьон чэпчэки сыаналаах кыбартыыралары ылаары, албыҥҥа түбэспитэ элбэх. Дьокуускайга көҥүлэ суох дьиэлэр баалларын дьон үксэ билбэт буолуохтаах. Элбэх киһи оннук дьиэлэргэ кыбартыыра атыылаһан албыннатар. Балаҕан ыйын 12 күнүгэр, СӨ Архитектуратын уонна тутуутун министиэристибэтэ көҥүлэ суох, сокуону кэһэн туран тутуллубут элбэх кыбартыыралаах дьиэлэринэн пресс-тур оҥордо.
СӨ архитектуратын уонна тутуутун миниистирин бастакы солбуйааччыта Павел Аргунов салалталаах суруналыыстар пресс-турдара көҥүлэ суох тутуллубут түөрт дьиэҕэ сырытта.
Дьиэ эриэнэ эмиэ иһигэр эбит
Сэбиэскэй Аармыйа 50 сыла уулусса 26 нүөмэрдээх дьиэтэ тас көстүүтүнэн хонтуора эбэтэр атыы-эргиэн киинин курдук эрээри, бу олорор дьиэ. А. А. Усатов туппут үс этээстээх, маҕаһыыннаах уонна гараастаах дьиэтэ дьэрэкээн тас көстүүтүнэн киһи хараҕын манньытар. Ол эрэн, бу дьиэ көҥүлэ суох тутуллубут. Турар сирэ бэйэ бас билиитигэр баар эрээри, сир бырамыысыланнас эбийиэгэ тутулларыгар бэриллибит. Манна кыбартыыра атыыласпыт дьон кыбартыыраларын бэйэ бас билиитигэр ылар кыахтара суох. Дьокуускай куорат Усатовы кытта сууттаспыта да кыайбатаҕа. Кини бу дьиэни бэйэбэр тутуннум диэн куотуммут.
Эппиэттээччи анараа дойдуга куоппут
Иккис эбийиэкпит Роберт Бурнашов аатынан переулок 12/1 б дьиэтэ. Бу дьиэ сирин аҥаара арендаҕа ылыллыбыт, аҥаарыгар көҥүл суох. Дьиэни туппут Виктор Тиранов оҥорон таһаарар база туттуом диэн сир арендалаан баран, бастакы этээһигэр гараастаах, иккис этээһигэр олорор кыбартыыралардаах дьиэни тутан таһаарбыт. Дьиэ турар сирин аҥаара эппитим курдук, уоруллубут сир. Кыбартыыра аайы дьон олорор. Аһаҕастык эттэххэ, бу дьиэ дьылҕата салгыҥҥа ыйанан турар. Дьыаланы Виктор Тиранов өлбүтэ уустугурдар. Дьокуускай куорат салалтата сууттаһан дьыаланы кыайыа этэ да, эппиэттиир киһи суох. Бастакы кыбартыыраҕа тоҥсуйбуппутугар, эмээхсин арыйбыта. Кыбартыыра бас билиигэ сылдьара барыбытын соһутта. Эмээхсин тугу да билбэт. Саастаах киһи дьиэ докумуонугар тугу быһаарсыаҕай? Кийиитим билэр диэбитэ. Хайдах бу кыбартыыра бас билиигэ киирбитин Росреестр эрэ билэр кыахтаах.
Аатырбыт Саакян
Айдааннаах Лермонтов 77 аадырыһыгар баар Смбат Саакян салалталаах «Товары Саха Якутместпром» ХЭУо элбэх кыбартыыралаах дьиэтэ эмиэ бу испииһэккэ киирсэр. Бу дьиэ турар сирэ сокуону кэһэн туран бэриллибитин дьон өйдүүр буолуохтаах. Дьиэ турар сорох сирэ эмиэ уоруллубут сир. Ол иһин тутууну ыытарга көҥүл бэриллибэтэх. Ол эрэн, СӨ Тутууну хонтуруоллуур судаарыстыбыннай салалтатыгар тугу да биллэрбэккэ, тутааччы дьиэ аҥаарын тутан таһаарбыт. Бу дьиэҕэ биир да киһи кыбартыыра ылбатах. Билигин тутуу тохтоон турар. Дьокуускай мэрията тутааччыны кытта сууттаһа сылдьар.
Гараастан уратыта суох дьиэ
Маяковскай аатынан уулусса 89/1 аадырыһыгар турар дьиэ икки этээстээх гараас уонна үлэлиир офис буолуохтаах этэ. Ол эрэн, тутааччы эбии үһүс этээһи тутан, кыбартыыралары оҥорон атыылыы охсубут. Тас көрүҥүттэн дьон олорор дьиэтигэр олох майгыннаабат диэн бэлиэтиир тустаахпын. Дьиэ таһыгар кир-бөх элбэҕэ, сыта-сымара, мас туалет турара киһини дьиксиннэрэр. Суут нөҥүө мэрия тутааччыга үһүс этээһи көтүрдүн диэн бириэмэ биэрбит.
Павел Аргунов, СӨ архитектуратын уонна тутуутун миниистирин бастакы солбуйааччы:
— Бу дьиэлэргэ кыбартыыра ылымаҥ диэн сэрэтэбин. Көҥүлэ суох тутуллубут дьиэлэри атыыластаххытына элбэх кыһалҕаҕа түбэһиэххит, ночоокко киириэххит. Маннык тутааччылары эппиэккэ тардар сороҕор олус ыарахан. Сокуон эриэхэбэй буолан, тутааччыны сууттаһан эппиэккэ тардар уустуктардаах. Ол иһин, сокуону федеральнай таһымҥа уларытыахха наада. СӨ тутууну хонтуруоллуур судаарыстыбаннай салалтатын боломуочуйатын уонна ыстараабы үрдэттэххэ сатанар. Холобура, Сэбиэскэй Аармыйа 50 сыла уулуссатын 26 нүөмэрдээх дьиэтин туппут Усатовы суут 2000 солк. ыстарааптаабыта. Сокуону кытаатыннарыахха наада. Инник дьиэлэргэ кыбартыыра ылбыт дьон суут нөҥүө бас билии докумуонун оҥорторо сатааҥ. Албыннаппыт дьон бары сууттастахтарына, биһиги борокуратуура нөҥүө тутааччыны эппиэккэ тардар кыахтаныахпыт. Дьокуускайга көҥүлэ суох тутуллубут дьиэ элбэх.
Наталья Чусовская, СӨ тутууну хонтуруоллуур судаарыстыбаннай управление салайааччыта:
— Кыбартыыраны долевой тутууга кыттыһар дуогабар нөҥүө эрэ ылыахха наада. Мантан атын дуогабарынан атыылаһар сатаммат. Долевой дуогабарынан ылыллар кыбартыыра тутааччыта туох баар бэрэбиэркэни ааһар. Маннык дьиэлэри атыыласпыт дьон, суут нөҥүө түһэрсибит дуогабардарын быстаран, төлөөбүт харчыларын төнүннэрэ сатаатыннар диэн сүбэлиибин.
Николай Попов, «Саха сирэ» хаһыат, edersaas.ru