Улуустартан куоракка көһөн кэлэр дьон ахсаана сыллата эбиллэ турар. Ону кытта оскуолаҕа үөрэнэр оҕо ахсаана үксүүр. Күн бүгүн уопсайа 42 тыһ тахса оҕо үөрэнэр. Маҥнайгы кылааска 5000-тан тахса оҕо киирбит.
edersaas.ru
Ол курдук, үөрэх дьылын устата бастакыттан уон биирис кылааска диэри, ортотунан, 1200-1500 оҕо кэлэрин бэлиэтииллэр. Кэлиҥҥи биэс сыл устата, үөрэнээччи ахсаана 8000 оҕонон эбиллибит.
Дойду үрдүнэн оскуола үөрэнээччилэрин биир симиэнэҕэ көһөрөр үлэ барар. Былаан быһыытынан 2025 сылга диэри икки-үс симиэнэҕэ үөрэтии суох буолуохтаах. Онтон күн бүгүн Дьокуускайга баар 50 муниципальнай оскуолаттан 47-гэр икки симиэнэнэн үөрэтэллэр. Манна даҕатан эттэххэ, былырыын Дьокуускай куорат оскуолаларын биир симиэнэҕэ көһөрүү “дорожнай картата” оҥоһуллубута. Ити былааҥҥа олоҕуран, 35 саҥа оскуола, 12 салҕааһын, 2 үрүт салҕааһын тутуллуохтаах уонна 9 эбийиэк оскуолаҕа анаан атыылаһыллыахтаах.
Холобура, Дьокуускай куорат 203 оройуонугар 3 уһуйаан уонна икки оскуола тутуллара былааннанар. “Айыы кыһата” оскуола эһиил үлэҕэ киириэхтээх. Оттон 360 миэстэлээх оскуола, 18-с №-дээх оскуола курдук бырайыактаах буолуо диэн былаанныыллар.
Биллэн турар, тыа сириттэн көһөн кэлбит дьон итиэннэ куорат олохтоохторо оҕолорун сахалыы тылынан үөрэттэрэргэ дьулуһаллар. Төрөппүттэр, оҕолор ити баҕаларын учуоттаан, сыллата сахалыы кылаастары эбэллэр. Ол курдук, Дьокуускай куорат баһылыга Айсен Николаев дьаһалынан, 2017-2025 сылларга сахалыы тыллаах, иитиилээх кылаастары, бөлөхтөрү эбэр туһунан кэлимсэ бырайыак оҥоһуллубут. Онно олоҕуран, 2025 сылга сахалыы тыллаах кылааһы 36,9 бырыһыаҥҥа тиэрдиэхтээхтэр. Ити сыыппара билиҥҥитэ 24 бырыһыаҥҥа тэҥнэһэр.
Людмила ПОПОВА, “Саха сирэ” хаһыат, edersaas.ru