Дьокуускай 390 сылыгар анаммыт үөрүүлээх мунньах буолла

Ааптар: 
Бөлөххө киир:

Дьокуускай куорат үбүлүөйдээх сылыгар анаммыт үөрүүлээх мунньах балаҕан ыйын 10 күнүгэр Опера уонна балет тыйаатырыгар буолан ааста.

Мунньаҕы арыйарыгар мээр Евгений Григорьев ирбэт тоҥноох, кыыдааннаах кыһыннаах дойдуга өрөспүүбүлүкэ киин куората үүнэригэр-сайдарыгар кылааттарын киллэрбит хорсун хоодуот үлэһит туруу дьоҥҥо, бэтэрээннэргэ, чуолаан тутааччыларга, инженердэргэ, учуонайдарга махтанна. Кини аны уон сылынан, Дьокуускай 400 сылын көрсө, куораппыт ирбэт тонҥо турар бастыҥ куоратынан аатырыаҕа диэн эрэнэрин биллэрдэ. Ылыныллыбыт сайдыы тосхоллоро, былааннар, өрөспүүбүлүкэ салалтатын өйөбүлэ, норуот күүһэ манна төһүү буолуоҕа.

Ил Дархан Айсен Николаев куорат дьаһалтатын салайбыт кэмин ахтан-санаан ааста. Кини оччотооҕу былаан үксэ кэриэтэ туолбутунан киэн туттарын эттэ. 2012 с. саҕалаан саҥа оскуолалар, уһуйааннар, балыыһалар тутуллан киирэн барбыттара, суол-иис оҥоһуллубута, өрөспүүбүлүкэ, федеральнай киин көмөтүнэн ГРЭС-2, водозабор үлэҕэ киирбиттэрэ. Киин куораппыт аны уон сылынан өссө сайдыаҕын бэлиэтээтэ. Ол туһугар анаан Дьокуускай куорат 2032 с. диэри стратегическай сайдыытын туһунан ыйаахха илии баттаабытын санатта.

Салгыы баһылык Евгений Григорьев уонна Куорат Думатын бэрэссэдээтэлэ Альберт Семенов Айсен Николаевка Дьокуускай куорат Бочуоттаах гражданина үрдүк аатын иҥэрбиттэрин биллэрэн, дастабырыанньаны туттардылар уонна аалай лиэнтэни ииллилэр.

Ил Дархан олус долгуйбутун бэлиэтээн туран: «Куорат бочуоттаах олохтооҕо үрдүк аат эрэ буолбатах, өрөспүүбүлүкэ салайааччытын быһыытынан Дьокуускай ирбэт тоҥҥо турар бастыҥ куорат оҥорорго улахан эппиэтинэс», — диэтэ.

Бэтэрээннэр ааттарыттан тыл этээччи РФ култууратын үтүөлээх үлэһитэ, СӨ үтүөлээх артыыһа Афанасий Федоров Айсен Николаевка бочуоттаах аат иҥэриллибитин икки илиитинэн өйүүрүн эттэ. Кини Айсен Сергеевич, мээрдии олорон, сахалыы тыллаах оскуола, кылаас элбиирин, төрүт үгэспит, култуурабыт чэчирии сайдарын туһугар үтүмэн үлэ ыыппытын бэлиэтээтэ.

Ыччат аатыттан эдэр сүүрүк Диана Адасько куораппытыгар чөл олоҕу туругурдарга, спордунан дьарыктанарга бары усулуобуйа тэриллибитин ыйда. Атын эрэгийиэнтэн сылдьар кини доҕотторо Саха сиригэр үрдүк таһымнаахтык ыытыллар спортивнай күрэхтэргэ ымсыыраллар эбит. Чахчыта атын субъектарга биһиэхэ Манчаары оонньуулара биитэр норуоттар спартакиадалара курдук тэрээһиннэр ыытыллыбаттар.

Үөрүүлээх мунньаҕы ырыаһыттар Далаана, Сахаайа, Сайыына, Леонид Анциферов, Василий Пинигин, Сахамин, «Бриллианты Якутии» үҥкүү аансамбыла, «Надежда» үҥкүү кулууба» уо.д.а. киэргэттилэр.

«Саха сирэ» хаһыат

+1
0
+1
0
+1
0
+1
0
+1
0
+1
0
+1
0