Дьокуускай 385 сыла. Үүнэ-сайда тур, тапталлаах куораппыт!

Ааптар: 
Бөлөххө киир:

Дьоллоох Дьокуускай 385 сылынан тэрээһин үлэ өрө көтөҕүллүүлээхтик саҕаланна. Далааһыннаах бырааһынньыгы, бэстибээллэри, дьаарбаҥкалары, үтүө санааланыы уонна социальнай аахсыйалары, куонкурустары, спортивнай күрэхтэһиилэри уопсастыбаннай тэрилтэлэр, ассоциациялар, айар түмсүүлэр иилээн-саҕалаан ыыталлар, бар дьону ыҥыраллар. 


Үбүлүөйдээх тэрээһин уон күн устата салҕаныа.  Маныаха долгутуулаах бырааһынньык тыына «Ykt Geek Fest – 2017» бэстибээлтэн саҕаланна. Атырдьах ыйын 28 күнүгэр, Комдрагмет дьиэтигэр Национальнай художественнай музей быыстапкалыыр саалатыгар СӨ худуоһунньуктарын түмсүүлэрин көҕүлээһининэн, Дьокуускай куоракка анаммыт өрөспүүбүлүкэ биллиилээх худуоһунньуктарын уонна скульптордарын  быыстапката арылынна.

Сарсын 14.00 чаастан Орджоникидзе болуоссатыгар «Так просто быть добрым» диэн үтүө санаа дьаарбаҥката ыытыллыа. Манна уопсастыбаннай түмсүүлэр кыттыахтара. Сибэккини олордор бэтэрээннэр, биэнсийэлээхтэр элбэх оҕолоох дьиэ кэргэттэр бастакы кылааска киирэр оҕолоругар сибэкки дьөрбөлөрүн бэлэхтиэхтэрэ. Бу күн саха эстрадатыгар биллэр-көстөр ырыаһыттар Сахаайа уонна Александр Бурнашевтар айар мастарыскыайдарыгар дьарыктыыр оҕолорун кытары кэнсиэртиэхтэрэ.

Атырдьах ыйын 31 күнүгэр 15.00 чаастан Комсомол болуоссатыгар олимпийскай чөмпүйүөн Роман Дмитриевкэ анаммыт Сквер аһыллыыта буолуоҕа.

Билии күнүгэр куорат уокуруктарыгар уонна куорат таһынааҕы бөһүөлэктэргэ оҕо оонньуур уонна спортивнай былаһааккаларын арыйыахтара. 19-с, 20-с №-дээх, Марха  1 №-дээх орто оскуолаларыгар «Народный бюджет» уонна «Школьные дворы столицы» бырайыактар чэрчилэринэн саҥа спортивнай комплекстары, мини-стадионнары арыйыы үөрүүтэ-көтүүтэ дьону-сэргэни түмүөҕэ.

Балаҕан ыйын 2 күнүгэр күнүс 12.00 чаастан «Туймаада саллаата» мемориальнай комплекска Аҕа дойду Улуу сэриитин кыттыылаахтарын ааттара суруллубут мемориальнай билиитэ ууруллуо.

Бэлиэ даата чэрчитинэн, Дьокуускай куорат 5-с ньүөмэрдээх кырдьаҕас оскуолата тэриллибитэ 110 сылыгар аналлаах тэрээһин ыытыллыа.

Балаҕан ыйын 5—9 күннэригэр Култуура уонна сынньалаҥ пааркатыгар «Ойуур остуоруйалара» диэн мас оҥоһуктар  II бэстибээллэрэ ыалдьыттары уонна куорат олохтоохторун ыҥырар. Остуоруйа дьоруойдара пааркаҕа оҕо-аймах сөбүлээн оонньуур сирдэрин киэргэтиэхтэрэ.

Балаҕан ыйын 6-10 күннэригэр норуоттар икки ардыларынааҕы V киинэ-бэстибээлэ ыытыллыа. Бэстибээлгэ ыраахтан-чугастан биллэр-көстөр киинэ режиссердара, продюсердар, артыыстар мустуохтара. Саха тыйаатырыгар уонна куорат киинэҕэ тыйаатырдарыгар киинэлэр көрдөрүллүөхтэрэ.

«Атласовтар уһаайбалара» этническай комплекска Дьокуускайдааҕы художественнай училище көҕүлээһининэн, аан бастаан туойтан уонна керамикаттан оҥоһуктар бэстибээллэрэ ыытыллара былааннанар.

Үөрүүлээх даата чэрчитинэн Эдьигээн оройуонун күннэрэ буолуоҕа.  Эдьигээн улууһуттан кэлбит норуот маастардарын быыстапка-дьаарбаҥкалара болҕомтону тардыаҕа. Эт, балык, үүт аһылыктар атыыланыахтара. «Аюкта» бэстибээл-куонкуруһу үгүс киһи сэргиэ, кэрэхсиэ.

Нэһилиэнньэ дьарыктаах буолуутун Киинин уонна ыччакка үлэ биржатын тэрийиилэринэн ыытыллар «Работа – Fest» ыччаты күүтэр.

Уокуруктар, куорат таһынааҕы бөһүөлэктэр, үлэ кэлэктииптэрэ, уопсастыбаннай тэрилтэлэр, түмсүүлэр кыттыылаах карнавал дьону-сэргэни түмүөҕэ. Саамай чаҕылхайдык киэргэтиллибит, толдкуйдаммыт колонналарга Дьокуускай куорат дьаһалтата дипломнары уонна бэлэхтэри туттартыа.

Ийэ скверигэр Сайсары уокуругун управлениетын тэрийиитинэн, эдэр ыаллар аллеяларыгар маһы, талаҕы олордуохтара. Манна балаҕан ыйын 9 күнүгэр «Авто-мото Fest» бэстибээлгэ былыргы массыыналары, матассыыкыллары көрдөрүөхтэрэ.

Дьокуускайы төрүттээбит Петр Бекетов, айанньыт Семен Дежнев уонна губернатор Иван Крафт пааматынньыктарыгар бэлиэ күҥҥэ сибэккилэр ууруллуохтара.

Балаҕан ыйын 10 күнүгэр национальнай общиналар бэстибээл-дьаарбаҥкалара, кэнсиэртэрэ күүтэр. Саха Өрөспүүбүлүкэтигэр олорор национальнай общиналар тустарынан документальнай киинэ көрдөрүллүө.

Кузбасстан кэлбит «Сибирский калейдоскоп» диэн айар бөлөх балаҕан ыйын 8 күнүттэн үбүлүөй үөрүүтүгэр-көтүүтүгэр кыттыһыа, балаҕан ыйын 10 күнүгэр Ленин болуоссатыгар күнүс 15.00 чаастан кэнсиэртиэ.

Дьокуускай төрөөбүт күнүгэр анаан оҥоһуллубут аккырыыккалары Ленин болуоссатыгар балаҕан ыйын 10 күнүгэр кэлэн толоруоххутун, чугас дьоҥҥутугар ыытыаххытын сөп.

«Триумф» спорт киинигэр үөрүүлээх мунньах уонна Дьокуускай бочуоттаах гражданинын чиэстээһин буолуоҕа.

Бырааһынньык чэрчитинэн «Мамалыш» оҕо күүтэр ийэлэр бэстибээллэрэ, доруобуйа дьаарбаҥката, «Вкусноград» гастрономия бэстибээлэ, «Созвездие мастеров», «Читай-город», о.д.а. тэрээһиннэр күүтэллэр.

Бырааһынньыктааҕы тэрээһиннэр балаҕан ыйын 10 күнүгэр куорат бары болуоссаттарыгар уонна сквердэригэр ыытыллаллар. Күнүс 12.00 чаастан Ленин болуоссатыгар «Город любви, семьи и верности» тэрээһин буолуоҕа. Манна эдэр ыаллары уонна кыһыл көмүс сыбаайбалаахтары эҕэрдэлиэхтэрэ.

Үөрүүлээх, долгутуулаах бырааһынньык киэһэ 22.00 чааска «Тапталлаах куораппыт, төрөөбүт күҥҥүнэн!» уоттаах-күөстээх салютунан түмүктэниэ.

Дьокуускай 385 сылынан бу бэлиэ даатаны тэрийэн, иилээн-саҕалаан ыытааччылар бар дьонноругар 100-тэн тахса араас тэрээһини бэлэмнээтилэр. Кэлиҥ, сылдьыҥ, ыалдьыттааҥ!

Дьокуускай куорат уопсастыбаннаһы, иһитиннэрэр-биллэрэр маассабай сириэстибэлэри кытта сибээскэ Департамена. 

+1
0
+1
0
+1
0
+1
0
+1
0
+1
0
+1
0