Дьокуускай Дмитрий Коркин кэриэһигэр норуоттар икки ардыларынааҕы турниры ыытарга бэлэм
Балаҕан ыйын 28 күнүттэн Дьокуускайга Саха АССР, РСФСР, ССРС үтүөлээх тириэньэрэ Дмитрий Коркин кэриэһигэр көҥүл тустууга норуоттар икки ардыларынааҕы турнир тэрээһиннэрэ үгэс быһыытынан көҥүл тустуу сайдыытын боппуруостарыгар анаммыт научнай-практическай кэмпириэнсийэттэн саҕаланнылар. Сарсыҥҥыттан “Триумф” спорт киинигэр түөрт ыйааһыҥҥа – 57-65-74-97 кг — бастакы хапсыһыылар буолуохтара.
Күрэхтэһии кылаабынай судьуйатынан норуоттар икки ардыларынааҕы категориялаах судьуйа Александр Чуенко (Москва) үлэлиэҕэ. Александр Чуенко аан дойдуга көҥүл тустууга Гран-при таһымнаах ахсааннаах күрэхтэһии баарын, олортон биирдэстэрэ манна, Саха сиригэр, ыытылларын бэлиэтээн эттэ.
Онус үбүлүөйдээх Коркин турнирыгар 25 дойду бөҕөстөрө аат ааттаан кэллилэр. Ити Арассыыйа алта регионун тустууктарын аахпакка туран. Барыта аҕыс ыйааһыҥҥа 200-тэн тахса бөҕөс мэтээл иһин киирсиэҕэ. Ааттаах-суоллаах кыттааччылары билиһиннэрдэххэ, Дьокуускай түһүлгэтигэр аан дойду Кубогын кыайыылааҕа Ибрагим Юсубов (Азербайджан), Рио-де-Жанейротааҕы Олимпиада боруонса призера Сонер Демирташ (Турция), аан дойду чөмпүйүөнэ Амит Кумар (Индия), Азия чөмпүйэнээтин призера Занданбуд Занабазар ( Монголия), Европа 2015 сыллааҕы призера Неби Узун (Турция), уо.д.а. тустуохтара.
“Триумфка” үс көбүөрүнэн барар хапсыһыылары Олимпийскай оонньууларга, аан дойду чөмпүйэнээттэригэр үлэлээбит Арассыыйа уонна омук дойдуларын бастыҥ судьуйалара дьүүллүөхтэрэ.
Тустуу аан дойдутааҕы холбоһуктаах түмсүүтүттэн (UnitedWorldWrestling) Гран-при серия турнирын техническай дэлэгээтинэн Халил Ибрагим Чичиоглу (Турция) ыҥырыллан кэллэ.
Роман Попов, “Саха сирэ” хаһыат, edersaas.ru