Ил Түмэн дьокутааттара Таатта улууһун бэрэстэбиитэллээх уорганнарын дьокутааттарын, нэһилиэктэр баһылыктарын ассоциациятын тэрээһинигэр кыттыыны ыллылар.
Бу тэрээһин Саха Автономиятын төрүттэспит судаарыстыбаннай—политическай деятель, саха чулуу уола П.А.Ойуунускай төрөөбүтэ 125 сылыгар ананна. Амма, Чурапчы, Мэҥэ Хаҥалас дьокутааттарын дэлэгээссийэлэрэ сырыттылар. Көрсүһүү сэминээр быһыытынан ыытылынна. Ил Түмэн олохтоох салайыныы боппуруостарыгар сис кэмитиэтин бэрэссэдээтэлэ Василий Местников былырыын баччаларга буолан ааспыт Саха сирин бэрэстэбиитэллээх уорганнарын дьокутааттарын I сийиэһин уураахтарын олоххо киллэрии хаамыытын туһунан кэпсээтэ. Кулун тутар 1 күнүгэр Ил Түмэҥҥэ өрөспүүбүлүкэ бэрэстэбиитэллээх уорганнарын сүбэ мунньахтара ыытылларын туһунан иһитиннэрдэ. Ил Түмэн тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Дмитрий Саввин парламент үлэтин-хамнаһын, ханнык сокуоннар барыллара көрүллэллэрин билиһиннэрдэ.
Муниципальнай тэриллиилэр өрөспүүбүлүкэтээҕи сэбиэттэрин толоруулаах дириэктэрэ Дмитрий Горохов соторутааҕыта буолан ааспыт муниципальнай тэриллиилэр VII сийиэстэрин резолюциятын туһунан кэпсээтэ. Салгыы Ил Түмэн дьокутаата Константин Борисов, Ил Дархан иһинэн коррупцияны утары управление салайааччытын солбуйааччы Александр Уаров, Таатта улууһун баһылыгын солбуйааччы Изабелла Сивцева, Чурапчы улууһун дьокутааттарын сэбиэтин бэрэссэдээтэлэ Яков Оконешников, Амма улууһун дьокутааттарын сэбиэтин бэрэссэдээтэлин солбуйааччы Николай Ксенофонтов уо.д.а. тыл эттилэр.
Сэминээр кыттыылаахтара Ытык Күөлгэ П.А.Ойуунускай пааматынньыгар сибэкки уурдулар. Күн иккис аҥарыгар Чөркөөххө, Саха Өрөспүүбүлүкэтин Судаарыстыбаннаһын мусуойугар Былатыан Ойуунускай төрөөбүтэ 125 сылыгар анаммыт быыстапканы көрдүлэр, Октябрьскай нэһилиэк олохтоохторун кытта көрүстүлэр.
Раиса Сибирякова, Саха сирэ” хаһыат, edersaas.ru.
Сэминээр кыттыылаахтара.