Дьокутааттар олохтоох салайыныы уорганын үлэтин хайысхатын уларытыыны дьүүллэстилэр

Ааптар: 
Бөлөххө киир:

Ил Түмэн бастакы вице-спикерэ Александр Жирков салайан ыыппыт 33-с (уочарата суох) алтыс ыҥырыылаах тэйиччиттэн ыытыллыбыт пленарнай мунньаҕар норуот дьокутааттара олохтоох салайыныыга сыһыаннаах уларытыылары киллэрэр федеральнай сокуон бырайыагын өйөөтүлэр.

Сүрүн дакылааты Ил Түмэн судаарыстыбаннай тутууга уонна олохтоох салайыныыга сис кэмитиэтин салайааччыта Владимир Прокопьев оҥордо.

Кини суолталаах федеральнай сокуон барыла б.дь. тохсунньу 14 күнүгэр сис кэмитиэт киэҥ ыҥырыылаах мунньаҕар көрүллүбүтүн иһитиннэрэн туран, бу боппуруоска туһааннаах үгүс этии киирбитин бэлиэтээтэ. Салгыы парламентарий муниципальнай тэриллиилэр баһылыктарын уонна дьокутааттарын долгутар кэккэ боппуруоска уонна саҥа тэриллибит муниципальнай уокурук баһылыктарын талыы бэрээдэгэр тохтоото.

Сокуон бырайыагар ыйылларынан, 2023 сыл тохсунньу 1 күнүттэн нэһилиэктэр, муниципальнай оройуоннар бэрэстэбиитэллээх уорганнарын дьокутааттарын саҥа быыбардара анамматтар уонна ыытыллыбаттар. Оччотугар муниципальнай оройуон, ону тэҥэ кини састаабыгар киирбит нэһилиэктэр бэйэни салайынар үлэлэлэрэ тохтуур. Муниципальнай тэриллии бэрэстэбиитэллээх уорганын боломуочуйатын болдьоҕо ааспытын кэннэ муниципальнай уокурук үөскүүр. Парламентарий бэлиэтээбитинэн, сокуону ылыныы кэнниттэн үлэ түмүктэммэт.

Суолталаах боппуруоска бэйэлэрин санааларын СӨ дьокутааттара Елена Голомарева, Павел Ксенофонтов, Михаил Эверстов, Виктор Губарев уонна Игорь Григорьев эттилэр.

Елена Голомарева аҕыйах ахсааннаах норуоттар бырааптара күөмчүлэммэтин уонна кэккэ өйөбүлүнэн туһаналларын туһугар аҕыйах ахсааннаах омуктар түөлбэлээн олорор сирдэрин «Национальнай муниципальнай уокурук» диэн ааттыырга этии киллэрэн, норуот дьокутааттарын болҕомтотун тарта.

Куоластааһын түмүгүнэн, «Публичнай былаас кэлим ситимигэр олохтоох салайыныыны тэрийии уопсай принциптэрин туһунан» федеральнай сокуон бырайыагынан уураах барыла ылылынна. Парламентарийдар сокуон барылыгар бэйэлэрин көннөрүүлэрин ыытар былааннаахтар.

Маны таһынан, олохтоох салайыныы сокуоннарыгар уларытыылары киллэриигэ оробуочай хамыыһыйалар тэриллиэхтэрэ.

Елена ПОТОЦКАЯ, “Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0